საქართველოსა და ამერიკის შეერთებულ შტატების ურთიერთობაში 2012 წელს რამდენიმე ახალი ინიციატივის გაჟღერება იგეგმება. ამის შესახებ საქართველოს პარლამენტის თავმჯდომარემ დავით ბაქრაძემ ამერიკის შეერთებული შტატების სახელმწიფო მდივნის თანაშემწის მოადგილესთან, ერიკ რუბინთან შეხვედრის შემდეგ განაცხადა.
"ვისაუბრეთ ყველა იმ თემაზე, რომელიც აქტუალურია საქართველოს და შეერთებული შტატების ურთიერთობაში. იცით, რომ აშშ-ის მხარდაჭერას აქვს გადამწყვეტი მნიშვნელობა საქართველოს უსაფრთხოების კუთხით, ასევე ევროატლანტიკური არჩევნის წარმატებისთვის, ეკონომიკური ვითარებისთვის, ამიტომ შეხვედრაზე ყველა ამ თემას შევეხეთ", - განაცხადა ბაქრაძემ.
მისი თქმით, რუბინთან შეხვედრაზე ასევე ისაუბრეს იმაზე, თუ რა არის დაგეგმილი 2012 წელს ორ ქვეყნის ურთიერთობების გასაუმჯობესებლად.
"სამწუხაროდ, არ მაქვს უფლება, ყველა დეტალზე გესაუბროთ, მაგრამ მინდა დაგარწმუნოთ, რომ მომავალი წელი იქნება ძალიან დადებითი, აქტიური და დინამიკური წელი ქართულ-ამერიკული ურთიერთობის შემდგომი განვითარებისთვის. 2012 წელს ვიხილავთ რამდენიმე ახალ ინიციატივას, რომელიც იქნება სასარგებლო საქართველოსთვის", - დასძინა ბაქრაძემ.
