"საქართველოსათვის გაკეთებულ საჩუქარს" უწოდებს საქართველოს საგარეო საქმეთა მინისტრი გრიგოლ ვაშაძე რუსეთის პრეზიდენტის დიმიტრი მედვედევის მიერ გაკეთებულ განცხადებას იმის შესახებ, რომ რომ 2008 წლის ომმა საქართველოს ნატოს წევრობა შეაჩერა.
"დიმიტრი მედვედევის განცხადება ეს პოლიტიკური აღსარებაა და უნდა ვთქვა, რომ 53 წლის განმავლობაში ჩემთვის ასეთი საჩუქარი იშვიათად თუ ვინმეს გაუკეთებია. ადამიანმა აღიარებითი ჩვენება ყოველგვარი ზეწოლის გარეშე მისცა. ეს ხომ შესანიშნავია ისტორიისათვის და რუსეთ-საქართველოს ურთიერთობის შემდგომი განვითარებისათვის", _ აცხადებს ვაშაძე "ბი-ბი-სი"-სთან საუბარში და აღნიშნავს: "ვინ იხსენებს ახლა, რუსეთის ჯერ კიდევ პრეზიდენტის დიმიტრი მედვედევის განცხადების შემდეგ "ოსი ხალხის გენოციდს", იმას თუ როგორ "გავარდა რუსეთი კისრისტეხით პატარა ოსი ერის დასაცავად სააკაშვილის სისხლიანი აგრესიისა და ქართველი ფაშისტებისგან", რომ "რუსეთმა შეაჩერა ცხინვალის ბარბაროსული დაბომბვა" - სხვათაშორის, აგრძელებს ვაშაძე - "თავად რუსეთმა გაანადგურა ცხინვალი ისე, რომ დღემდე ვერ აღუდგენიათ".
"უცბად, ყოველგვარი იძულებისა და ძალოვანი მეთოდების გარეშე, ერთ-ერთი მთავარ მოქმედ პირთაგანი, მთელს მსოფლიოს, დღისით, მზისით, სირცხვილისა და ბორძიკის გარეშე, ვლადიკავკაზში 58-ე არმიის ოფიცრებთან შეხვედრის დროს ნათლად, გასაგებად და კარგი რუსული ენით 2008 წლის აგვისტოს ომის დაწყების მთავარ მიზეზს ასახელებს. კერძოდ, ნებისმიერი მეთოდით, არ უნდა ყოფილიყო დაშვებული საქართველოს ნატოს წევრობა. ჩვენ გავიგონეთ", _ აცხადებს საგარეო საქმეთა მინისტრი და ხაზგასმით აღნიშნავს, რომ საქართველო მედვედევისა და ლავროვის მუქარის გამო თავისი სუვერენიტეტის მცირე ნაწილზეც კი არ აპირებს უარის თქმას.
"ჩვენ არ ვართ მზად ბატონი მედვედევის ან ბატონი ლავროვის მუქარების გამო ჩვენი სუვერენიტეტის მცირე ნაწილზეც კი ვთქვათ უარი", _ აღნიშნავს გრიგოლ ვაშაძე.
