საქართველოს პრეზიდენტი მიხეილ სააკაშვილი ვარშააში ევროკომისიის პრეზიდენტს ჟოზე მანუელ ბაროზოს შეხვდა. საუბარი ევროკომისიის პრეზიდენტთან დაგეგმილზე მეტხანს გაგრძელდა.
შეხვედრის შემდეგ ცნობილი გახდა, რომ მარტში ბაროზოს ინიციატივით, საქართველოში საგანგებო მისია გამოემგზავრება, რომელიც ევროპასთან უვიზო მიმოსვლის მოლაპარაკების დასაწყებად ყველა საჭიროს საკითხს დააზუსტებს.
შეხვედრაზე სააკაშვილმა და ბაროზომ მსოფლიოსა და რეგიონში მიმდინარე მოვლენებიც მიმოიხილეს.
"ჩვენ განვიხილეთ ევროკავშირისა და საქართველოს ურთიერთობების სხვადასხვა ასპექტი. თქვენ იცით, რომ საქართველოსთან ღმა და ყოვლისმომცველი სავაჭრო ურთიერთობების შესახებ დავიწყეთ მოლაპარაკებები. როგორც ხედავთ ევროკავშირსა და საქართველოს კარგი ურთიერთობა აქვთ, რომელიც მნიშვნელოვან პროგრესს განიცდის. გეტყვით იმასაც, რომ ჩვენ ვისაუბრეთ ევოპასა და რეგიონში მიმდინარე მოვლენებზე. რაც შეეხება რუსეთ-ევროკავშირის სამიტს, მინდა გითხრათ, რომ რუს პარტნიორებთან საქართველოს თემას ყოველთვის გავაჟღერებთ", - განაცხადა ჟოზე მანუელ ბაროზომ.
"ძალიან მოხარული ვარ ევროკომისიის პრეზიდენტთან შეხვედრის გამო, რადგან ის საქართველოს დიდი ხნის მხარდამჭერია მრავალი წლის განმავლობაში. აღსანიშნავია, რომ როგორ ის შეგვპირდა ორი წლის წინ და ახლა ვიწყებთ ამ მოლაპარაკებებს თავისუფალი ვაჭრობის შესახებ, რაც დიდი გარღვევაა ჩვენთვის. ასევე გვაქვს წინსვლა - მომავლა წელს უვიზო მიმოსვლასთან დაკავშირებით მოლაპარაკებების დაწყებაზე. გარდა ამისა, მადლიერები ვართ იმის გამო, რომ ოკუპაციის საკითხი ყველა სამიტსა და შეხვედრაზე მნიშვნელოვანი თემააა. ისე, როგორც ეს მოხდა ევროპარლამენტის რეზოლუციის შემთხვევაში. რუსეთთან დაკავშირებით, ორი დღის წინ მიღებული რეზოლუცია, რომელშიც ხაზგასმულია ჩვენს რეგიონში ოკუპაციის საკითხი, ძალიან ძლიერი დოკუმენტია. მე დარწმუნებული ვარ ევროპის მხარდაჭერასა და ჩვენს პროგრესში ევროინტეგრაციის მიმართულებით, - განაცხადა მიხეილ სააკშვილმა.