"თავისუფალმა დემოკრატებმა" პარტიის ლიდერის, ირაკლი ალასანიას ვიდეომიმართვა გაავრცელეს. ალასანია საუბრობს მისი გუნდის, ბიძინა ივანიშვილისა და "რესპუბლიკელების" პოზიციებზე ნატოსა და ევროკავშირში გაწევრიანებასა და რუსეთთან ურთიერთობის შესახებ.
ალასანიას განცხადებით, ბოლო კვირების განმავლობაში, ხელისუფლების კონტროლირებადი ნაციონალური მედიის საშუალებით, უსაფუძვლო თავდასხმები ხორციელდება მასზე და მის პარტნიორებზე - ბიძინა ივანიშვილზე და დავით უსუფაშვილზე მათი დამოკიდებულების გამო ევროპულ ოჯახში გაწევრიანებასა და რუსეთთან ურთიერობაზე.
მისი თქმით, "თავისუფალი დემოკრატებისა" და მისი პარტნიორების ურყევი პოზიციაა, რომ საქართველოს მომავალი ევროპულ ოჯახშია და ეს პოზიცია გადახედვას არ ექვემდებარება.
"თუ გვინდა, რომ მომავალში ნატოსა და ევროკავშირის წევრი ქვეყანა გავხდეთ, პირველ რიგში, აუცილებელია საქართველოში დემოკრატიული ინსტიტუტების გამყარება და თავისუფალი არჩევნების ჩატარება. ამის პოტენციალი საქართველოს და ქართულ საზოგადოებას ნამდვილად აქვს", - აცხადებს იგი.
ალასანია აღნიშნავს, რომ რუსეთთან დამოკიდებულებაში ისინი ხედავენ პრაგმატიზმს ქართული ინტერესებიდან გამომდინარე. მისი განცხადებით, რუსეთში ქართველი ბიზნესმენები ისე უნდა გრძნობდნენ თავს, როგორც რუსეთის ბიზნესის წარმომადგენლები საქართველოში. ალასანია დაინტერესებულია, რომ ქართულმა ბიზნესმაც შეძლოს ფეხი მოიკიდოს რუსეთში, რაც ქართული ეკონომიკისა და სოფლის მეურნეობისთვის ძალიან მნიშვნელოვანია.
"თავისუფალი დემოკრატების" ლიდერმა რუსეთში მიმდინარე საპროტესტო აქციებს მნიშვნელოვანი უწოდა. მისი თქმით, რუსმა ხალხმა გადაწყვიტა პროტესტი გამოხატოს იმ სისტემის გამო, რომელიც მათ თავისუფალი არჩევნის საშუალებას არ აძლევს.
"ჩვენ თვითონ მალე დავდგებით ასეთი სერიოზული არჩევნის წინაშე შემდეგ საპარლამენტო და საპრეზიდენტო არჩევნებში. დარწმუნებული ვარ, "თავისუფალი დემოკრატები", ბიძინა ივანიშვილი, დავით უსუფაშვილი და სხვა პარტნიორები, როდესაც გამოცხადდება პოლიტიკური ალიანსი, რეალურად შეძლებენ, თითოეული თქვენგანი დაარწმუნოს იმაში, რომ ჩვენი ამოცანა არის, პირველ რიგში, კონკურენტული არჩევნების ჩატარება, რომელიც იქნება რეალურად თავისუფალი და მეორე, რომ შემდეგი პარლამენტი იქნება მრავალპარტიული, რაც იმას ნიშნავს, რომ საქართველოს ბედი ერთპიროვნულად აღარ გადაწყდება", - განაცხადა მან.
ალასანიას თქმით, ყველაფერი დამოკიდებულია ქართულ საზოგადოებასა და მომავალ არჩევნებზე. მისი თქმით, მნიშვნელოვანია, ყველას ჰქონდეს ერთდღიანი სამოქალაქო გაბედულება, მივიდეს არჩევნებზე და გულის კარნახით მისცეს ხმა იმ პოლიტიკურ ძალას, რომელსაც მხარს უჭერს.
"რას გააკეთებს "ნაციონალური მოძრაობა", ახლა არაა საკითხავი, ახლა საკითხავია, რას გააკეთებს საქართველოს თითოეული მოქალაქე; თუკი ასეთი გამბედობა ყველას გვეყო, ცვლილება იქნება გარდაუვალი და საქართველო მართლაც გახდება მოწინავე მსოფლიო თანამეგობრობის ნაწილი; მიუხედავად იმისა, რა სიყალბესაც არ უნდა ავრცელებდეს კონტროლირებადი ნაციონალური მედია, სიმართლე ყოველთვის იმარჯვებს", - განაცხადა ალასანიამ.