საქართველოს სახალხო დამცველის ანგარიშის თანახმად, დადებითად აღსანიშნავია 2011 წელს საქართველოს სისხლის სამართლის კოდექსის მე-40 მუხლში შესული ცვლილება, რომლის თანახმად, პატიმრობის ალტერნატიულ სანქციად შესაძლებელია საზოგადოებისათვის სასარგებლო შრომის გამოყენება.
სახალხო დამცველი იმედოვნებს, რომ აღნიშნული ცვლილების პრაქტიკული გამოყენება შეამსუბუქებს გადატვირთულობის პრობლემას სასჯელაღსრულების დაწესებულებებში.
"სასჯელაღსრულების დეპარტამენტიდან მიღებული პასუხის თანახმად, საანგარიშო პერიოდში სასჯელაღსრულების დაწესებულებებიდან სხვადასხვა საფუძვლით გათავისუფლებული იქნა 4508 პატიმარი; მათ შორის 225 გათავისუფლდა პირობით ვადაზე ადრე, 554-ს დაენიშნა პირობითი გამოსაცდელი ვადა, 28 მსჯავრდებულს გადაუვადდა სასჯელის მოხდა, ხოლო 317 შეწყალებულ იქნა", - ნათქვამია ანგარიშში.
ანგარიშის თანახმად, 2011 წლის პირველ ნახევარში კვლავ დაფიქსირდა სასჯელაღსრულების ზოგიერთი დაწესებულების გადატვირთულობა.
"წამების პრევენციის ევროპული კომიტეტის მიერ არაერთხელ იქნა გაცემული რეკომენდაცია თითოეულ პატიმარზე სულ მცირე 4კვ.მ ფართის უზრუნველსაყოფად, თუმცა ახალ პატიმრობის კოდექსშიც იგივე ფართია გათვალისწინებული, რასაც ითვალისწინებდა ,,პატიმრობის შესახებ" საქართველოს კანონი. აღსანიშნავია, რომ ზოგიერთ სასჯელაღსრულების დაწესებულებაში არსებული ფართი თითოეული პატიმრისთვის ეროვნული კანონმდებლობით დადგენილ ნორმებსაც არ აკმაყოფილებს. სახალხო დამცველი თავის საპარლამენტო მოხსენებებში მუდმივად გასცემს რეკომენდაციებს აღნიშნული პრობლემის აღმოსაფხვრელად. რეკომენდაციები შეეხება როგორც ზედმეტად მკაცრი სისხლისსამართლებრივი პოლიტიკის შეცვლას, ასევე სისხლისსამართლებრივი დევნის პოლიტიკის განსაზღვრისას, საზოგადოებისათვის ნაკლებად საშიში დანაშაულების შემთხვევაში, პრიორიტეტის მინიჭებას თავისუფლების აღკვეთის ალტერნატიულ, უფრო მსუბუქ სასჯელის სახეებისთვის", - აღნიშნულია ანგარიშში.
