"ტურისტების კვლევა აჭარაში"- კვლევის მონაწილეთა აზრით, აჭარის რეგიონი, საქართველოს მეზობელ ქვეყნებთან შედარებით ზღვაზე დასვენების კუთხით გარკვეულ უპირატესობებს ფლობს.
კვლევის მიხედვით, თურქეთში ნაკლებად განვითარებულია შავი ზღვის სანაპირო ზოლი, შესაბამისად შავი ზღვის მოყვარულ ტურისტებს აჭარაში შესაძლებლობა ეძლევათ დაისვენონ უსაფრთხოდ და მიიღონ მაღალი დონის მომსახურება.
"უპირატესობები ექნება აჭარის მაღალმთიან რეგიონებს, იქიდან გამომდინარე, რომ ახლოს მდებარეობენ ქალაქ ბათუმთან, საერთაშორისო აეროპორტთან და საზღვართან, ადამიანებს ვინც გაჩერდებიან ბათუმში რამოდენიმე დღით ეძლევათ შესაძლებლობა მიიღონ განსხვავებული კლიმატი და სრულიად განსხვავებული პროდუქტი მაღალმთიან აჭარაში და ეს არის მისი უპირატესობა საქართველოს სხვა რეგიონებთან შედარებით."- განმარტავს აჭარის ტურიზმის დეპარტამენტის თავმჯდომარე ვაჟა დიასამიძე.
როგორც ცნობილია "ტურისტების კვლევა აჭარაში" "ეისითი კვლევის" მიერ UNDP-ის დაკვეთით მომზადდა.
თვისებრივი კვლევის შედეგად ირკვევა, რომ ტურისტები განსაკუთრებით ინტერესდებიან და იხიბლებიან ქართული კულტურით, ადგილობრივი სტუმართმოყვარეობით, ქართული სამზარეულოთი, რაც რესპონდენტების განცხადებით ხშირად ხდება ტურისტებისთვის განმეორებითი ვიზიტების მიზეზი.
რაოდენობრივი კვლევის მონაცემების მიხედვით, ტურისტების აჭარაში ხელმეორედ დაბრუნების მიზეზებს შორის მოიაზრება ადგილობრივი სტუმართმოყვარეობა/მეგობრული გარემო, მიზეზებს შორის ასევე სახელდება აჭარის ბუნება (უმეტეს წილად გარე ტურისტების მიერ) და განახლებული არქიტექტურა.
როგორც რაოდენობრივმა კვლევამ აჩვენა აჭარის შესახებ ინფორმაციას ტურისტები ძირითადად მეგობრებისგან იღებენ, წყაროებს შორის ასევე სახელდება პირადი გამოცდილება და ინტერნეტი. მცირე რაოდენობის ტურისტებმა დაასახელეს რადიო/ტელევიზია და ტურისტული სააგენტოები აჭარის შესახებ ინფორმაციის მიღების წყაროდ.
