არსებობს დიდი სივრცე ევროკავშირისა და აშშ-სთვის იმ თვალსაზრისით, რომ რუსეთზე დიპლომატიური და პოლიტიკური ზეწოლა განახორციელონ და აიძულონ ის შეწყვიტოს ქართული ტერიტორიების ოკუპაცია. ამის შესახებ EuraActiv-თან ექსკლუზიურ ინტერვიუში საქართველოს ვიცე-პრემიერმა გიორგი ბარამიძემ განაცხადა.
"ევროკავშირი - ჩვენი ყველაზე სერიოზული იმედია, ჩვენ გვინდა, რომ პოზიტიურები ვიყოთ, ჩვენ მეტის მიღწევა გვსურს, როდესაც ვხედავთ, რომ არასაკმარისი... მხარდაჭერა გვაქვს. პირველ რიგში, ის რაც ჩვენ ყველაზე მეტად გვინდა და მაქსიმალურად განსაზღვრული სახით, ეს არის მხარდაჭერა უსაფრთხოების სფეროში. ჩვენ ვხედავთ, რომ არსებობს დიდი სივრცე ევროკავშირისა და აშშ-სთვის იმ თვალსაზრისით, რომ რუსეთზე დიპლომატიური და პოლიტიკური ზეწოლა განახორციელონ და აიძულონ ის შეწყვიტოს ქართული ტერიტორიების ოკუპაცია, რადგან ეს პრობლემა ძალიან, ძალიან უკან გვწევს. ვგულისხმობ ქვეყნის ზოგად განვითარებას. თქვენ შეგიძლიათ წარმოიდგინოთ თუ რამდენად დიდი ტვირთია ეს ჩვენთვის: 350 000... იძულებით გადაადგილებული პირი, მთლიანობაში კი ნახევარი მილიონი დევნილი", - განაცხადა ბარამიძემ ინტერვიუში, რომლის ქართულ ვერსიას "ფორეინპრესი" აქვეყნებს.
მისი თქმით, საქართველოს მეტის გაკეთება შეუძლია და გააკეთებდა ყველაფერს გაცილებით სწრაფად რესურსები რომ ჰქონდეს.
"ჩვენ ვაჩვენეთ ყველას, რომ რესურსების პირობებში საქმის კეთება შეგვიძლია. ახლა ჩვენ ძველი დევნილების საკითხებს ვუბრუნდებით. არ გვინდა ჩვენი მეგობრების გაკრიტიკება, რადგან მადლიერნი ვართ მათი მხარდაჭერის გამო. ის რაც ყველაზე მეტად გვინდა, ეს არის მათი მხრიდან პოლიტიკური და დიპლომატიური ზეწოლა რუსეთზე და ევროკავშირის მეტი ჩართულობა უსაფრთხოების საკითხებში, რადგან ამ მომენტში რუსები ვერ გრძნობენ ზეწოლას ჩვენი მეგობრების მხრიდან. მათ ეს ოკუპაცია აღარ ანაღვლებთ. დიახ, ევროკავშირი მათთან ამ საკითხზე საუბრობს, მაგრამ რუსები ამ საუბარს სერიოზულად არ აღიქვამენ. ეს ცხადია", - აღნიშნა ვიცე-პრემიერმა.
