საპარლამენტო უმრავლესობის ლიდერმა პეტრე ცისკარიშვილმა დღეს ქრისტიან-დემოკრატები ~ამხილა~. ცისკარიშვილის განცხადებით, დეპუტატთა რაოდენობის გაზრდის ინიციატორები ქრისტიან-დემოკრატები იყვნენ.
~პირველ რიგში, ბატონ ლევან ვეფხვაძეს მინდა მივმართო, იმიტომ, რომ მან უმრავლესობა უსინდისოებად მოიხსენია, თითქოს რაღაც პირობებს არ ასრულებენ. ბატონ ლევანს მინდა შევახსენო, უსინდისობა არის სწორედ ის, როდესაც ინიციატივა 190 დეპუტატამდე გაზრდასთან დაკავშირებით, ძალიან კარგად იცის, რომ მათი მხრიდან მოდიოდა. კარგად იცის ისიც, რომ ამას ჩვენ კომპრომისის სახით დავეთანხმეთ, რომ მრავალპარტიული პოლიტიკური პლურალიზმი ყოფილიყო პარლამენტში და ოპოზიცია კარგად ყოფილიყო წარმოდგენილი~, - აღნიშნა ცისკარიშვილმა.
უმრავლესობის ლიდერის თქმით, ამ ინიციატივას ხელისუფლება კომპრომისის სახით დათანხმდა, რის შემდეგ საკონსტიტუციო კომისია შეიქმნა.
~ეს არის ჩვენი მხრიდან ბატონო ლევან, პირობის არშესრულება? ამაზე იძახით თქვენ რომ ეს არის უსინდისობა? სინამდვილეში, უსინდისობა არის ის, რასაც თქვენ არ ამბობთ, რომ სინამდვილეში ეს თქვენი ინიციატივა იყო, თქვენი მხრიდან მოდიოდა, შეიძლება მართებული ინიციატივაც იყო, რომ ოპოზიცია უფრო ძლიერად ყოფილიყო წარმოდგენილი მომავალ პარლამენტებში. ამის აღიარება არ გინდათ, გეშინიათ, ან გცხვენიათ. კი, ბატონო, არ გნებავთ, ჩვენ გადავხედავთ ამას, ამ გამოსვლების შემდეგ რაც მოვისმინეთ უმცირესობისა და ახლადშექმნილი ფრაქციის მხრიდან" - აღნიშნა ცისკარიშვილმა. მან კიდევ ერთხელ მიმართა ქრისტიან-დემოკრატებს, რომ პოლიტიკური ~შეთანხმება კი არ არის სამარცხვინო, სინამდვილეში, სამარცხვინო ის არის, რასაც თქვენ ახლა აკეთებთ და რაც აქ ხდება პარლამენტში~.
მისივე თქმით, უმრავლესობაში იმსჯელებენ და ამ საკითხზე გადაწყვეტილებას მიიღებენ.