„რადიო თავისუფლების“ ჟურნალისტის, რიკარდ იოზვიაკის ინფორმაციით, ევროკავშირის წევრი ქვეყნების მუდმივმა წარმომადგენლებმა 11 სექტემბერს რუსეთის წინააღმდეგ დაწესებული სანქციების გაგრძელებაზე შეთანხმებას კვლავ ვერ მიაღწიეს.
იოზვიაკის ცნობით, ელჩები საკითხის განსახილველად ორშაბათს, 14 სექტემბერს, კვლავ შეიკრიბებიან - სანქციების მოქმედების ვადის ამოწურვამდე ერთი დღით ადრე.
„სლოვაკეთს კვლავ სურს, სანქციების სიიდან უსმანოვისა და ფრიდმანის ამოღება. თუმცა, საკითხი ახლა კიდევ უფრო გართულდა, რადგან უსმანოვის ამოღება საფრანგეთსაც სურს“, - წერს იოზვიაკი სოციალურ ქსელ X-ზე.
