"ქართული დასის" ლიდერი, ჯონდი ბაღათურია ხელისუფლებას გიგანტომანიის და ახალ-ახალი ფანტაზიებით გამოსვლის შეჩერებისაკენ მოუწოდებს.
პარლამენტის პლენარულ სხდომაზე ბაღათურია პრეზიდენტ მიხეილ სააკაშვილის ინიციატივას გამოეხმაურა, რომელიც ახალი ქალაქის, ლაზიკას მშენებლობას შეეხება. ბაღათურიას მოსაზრებით, იგი ხელისუფლების ახალი ფანტაზიაა, რომლის განხორციელებაც მას მილიონები დაუჯდება.
"მახსენდება ბარონ მიუნჰაუზენის თავგადასავალი, რომელიც ცხენიანად ჭაობში ჩავარდნილი იქიდან ამოსვლას ფანტაზიით ლამობს. ასეთი ფანტაზიებით ვერც თქვენ და ვერც პრეზიდენტი ქვეყანას ჭაობიდან ვერ ამოიყვანთ. აშკარად ჩანს, რომ სახელმწიფოს სოციალური კოლაფსისაკენ მიაფრენთ. შეაჩერეთ ეს გიგანტიზმი, რომელიც მილიონების ხარჯვისა და მოსახლეობის სიდუხჭირის საფუძველი ხდება", -- აღნიშნა ჯონდო ბაღათურიამ.
ოპოზიციონერმა დეპუტატმა ხელისუფლებას ურჩია, ლაზიკას აშენებისათვის საჭირო თანხა ადგილობრივი მოსახლეობის პრობლემების გადაჭრას მოახმაროს.
