"მაესტროს" დამფუძნებლები ეროსი კიწმარიშვილს ტელეკომპანიის სარედაქციო პოლიტიკაში ჩარევის მცდელობაში ადანაშაულებენ. ამის შესახებ დამფუძნებლების მიერ გავრცელებულ განცხადებაში აღნიშნული.
"ა.წ. 28 ნოემბერს "მაესტროს" დამფუძნებელთათვის ცნობილი გახდა, რომ "მაესტროს" მართვის კომპანიის - "რუსთავის მედიის მართვის კომპანიის" დამფუძნებელმა, ეროსი კიწმარიშვილმა "მაესტროს" დირექციასა და დამფუძნებლებთან შეუთანხმებლად დანიშნა თათბირი "მაესტროს" ჟურნალისტებსა და პროდიუსერებთან. ვთვლით, რომ ეს ქმედება არის "მაესტროს" სარედაქციო პოლიტიკაში ჩარევის მცდელობა. გარდა ამისა, "მაესტროს" დამფუძნებელთათვის, ცნობილია, რომ მმართველ კომპანიას დაგროვილი აქვს დავალიანება ტელეკომპანიის რამდენიმე პარტნიორთან, რაც სერიოზულ საფრთხეს უქმნის "მაესტროს" ნორმალურ ფუნქციონირებას. მოვუწოდებთ "მაესტროს" გენერალურ დირექტორს, ილია კიკაბიძეს, მოახდინოს რეაგირება ამ ფაქტებთან დაკავშირებით, რადგან "მაესტროს" სარედაქციო დამოუკიდებლობა ისევე იყოს უზრუნველყოფილი, როგორც ეს აქამდე იყო", - აღნიშნულია განცხადებაში, რომელსაც ხელს აწერს ეკატერინე აკობია, მაკა ასათიანი, გიორგი ებრალიძე, მამუკა ღლონტი და ლევან ჩიკვაიძე.
