ნაპოვნი ბავშვის რეგისტრაციის წესი იცვლება. ნაპოვნი ბავშვის სახელის, გვარის, დაბადების სავარაუდო თარიღსა და ადგილის განსაზღვრა მეურვეობისა და მზრუნველობის ორგანოს კომპეტენცია იქნება.
მოქმედი კანონით, ბავშვის პოვნის თაობაზე განცხადება, პოლიციის ტერიტორიულ ორგანოში უნდა წარდგენილიყო. ამის შემდეგ პოლიციის ტერიორიული ორგანო ადგენდა ბავშვის დაბადების სავარაუდო დროს, ადგილს, აძლევდა მას სახელს და გვარს და მას რეგისტრაციის მიზნით, სამოქალაქო აქტების რეგისტრაციის ორგანოს აწვდიდა.
"სამოქალაქო აქტების" შესახებ ახალი კანონპროექტით კი, ნაპოვნის ბავშვის რეგისტრაციისათვის პოლიციის ტერიტორიული ორგანოსთვის მიმართვის ვალდებულება უქმდება.
ნაპოვნი ბავშვის დაბადების რეგისტრაციის თაობაზე სამოქალაქო აქტების რეგისტრაციის ორგანოს, მეურვეობისა და მზრუნველობის ორგანომ უნდა მიმართოს. შესაბამისად, ნაპოვნი ბავშვის სახელის, გვარის, დაბადების სავარაუდო თარიღსა და ადგილის განსაზღვრაც, მეურვეობისა და მზრუნველობის ორგანოს კომპეტენცია იქნება.
კანონპროექტის ინიციატორები დეპუტატები კახა ანჯაფარიძე და ზვიად კუკავა არიან.
