100 წლის დევნილ ქალბატონს, მარიამ ჭოველიძეს მინისტრმა კობა სუბელიანმა იუბილე მიულოცა. ე.წ. ცხინვალის რეგიონიდან, სოფელ ქემერტიდან დევნილ ქალბატონს 100 წელი დღეს შეუსრულდა. კობა სუბელიანმა, სამინისტროს თანამშრომლების სახელით მის ოჯახს საჩუქრად სარეცხი მანქანა მიუტანა.
ქალბატონ მარიამს 64 შთამომავალი ჰყავს, 9 შვილი, 55 შვილიშვილი და შვილთაშვილი. ის წეროვანის დევნილთა ჩასახლებაში ცხოვრობს. 100 წლის ქალბატონმა მინისტრს დაფასებისა და ყურადღებისთვის მადლობა გადაუხადა და დალოცა. მიუხედავად ასაკისა, ქალბატონი საკმაოდ მხნედ გამოიყურება და მინისტრს ოკუპირებულ სახლ-კარზეც ესაუბრა. სინანულით აღნიშნა, რომ საკუთარი სახლი ისე დაატოვებინეს რომ, მოსავლის აღებაც ვერ მოასწრო.
ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა კობა სუბელიანმა ქალბატონ მარიამს დღეგრძელობა და საკუთარ მიწა-წყალზე დაბრუნება უსურვა და მასთან ერთად ერთი ჭიქა შამპანიურიც დალია. ქალბატონმა მარიამმა კი იმედი გამოთქვა, რომ დაბრუნებასაც მოესწრება.
