საქართველოს პრეზიდენტმა მიხეილ სააკაშვილმა გორთან, ცენტრალურ მაგისტრალზე, 800-მეტრიანი საავტომობილო გვირაბი გახსნა, რომელიც ჩქაროსნული გზატკეცილის სვენეთი-რუისის 15 კილომეტრიან მონაკვეთზე მდებარეობს.
800-მეტრიანი თანამედროვე სტანდარტებით აშენებულ გვირაბში დამონტაჟებულია განათება, გვირაბში სატელეფონო წერტილებია მოწყობილი, რის მეშვეობითაც ნებისმიერ მძღოლს შეუძლია სატელეფონო კონტაქტი დაამყაროს.
პრეზიდენტი იქ დასაქმებულ ადამიანებს გაესაუბრა, მადლობა გადაუხადა იმ სამუშაოსთვის, რომელიც გვირაბის აშენებისთვის გაწიეს. შემდეგ ახლად აშენებული გვირაბი რეგიონული განვითარებისა და ინფრასტრუქტურის მინისტრ რამაზ ნიკოლაიშვილთან ერთად დაათვალიერა.
"როგორ პირობებში უწევთ მუშაობა, წვიმაში თქეშში, ზაფხულში წარმოუდგენლად სიცხეში და 24 საათს არ გაჩერებულა სამუშაო. არ ვიცი, რა ხელფასი უნდა გადავუხადოთ ამ ადამიანებს, რომ ასე საფუძვლიანად იმუშაონ. მინდა მადლობა გადაგიხადოთ, იმიტომ, რომ თქვენი ხელით არის გაკეთებული ეს ყველაფერი. რამაზი და მე კაბინეტებში ვსხედვართ და თქვენი ხელით კეთდება ყველაფერი. მადლობა იმისთვის, რომ ასეთ პირობებში იმუშავეთ. გვინდოდა 23-ში გაგვეხსნა, მაგრამ ვთქვით, რომ ერთ რიცხვში ყველაფერი არ კეთდება", - განაცხადა პრეზიდენტმა.
დღესვე სააკაშვილი ცენტრალური მაგისტრალის გორის მონაკვეთზე კომპანიების "ვისოლისა" და "სოკარის" მულტიფუნქციური კომპლექსების გახსნას დაესწრო. ბენზინ- და გაზგასამართი სადგურების გარდა, ორივე მათგანი დასვენებისა და გართობის ობიექტებსაც მოიცავს, მათ შორისაა, სწრაფი კვების ობიექტები, სუპერმარკეტები, ავტოსადგომები, სავალუტო და საბანკო მომსახურებისა და ბავშვთა გასართობი ცენტრები. "ვისოლისა" და "სოკარის" მრავალფუნქციური კომპლექსები გერმანელმა არქიტექტორმა იურგენ მეიერმა დააპროექტა.
