საქართველოს პრეზიდენტის ბრძანებულებით, ნარკომანიის წინააღმდეგ ბრძოლის უწყებათაშორისი საკოორდინაციო საბჭოს შემადგენლობა დამტკიცდა.
საქართველოში ნარკომანიის წინააღმდეგ ბრძოლის სტრატეგიისა და სამოქმედო გეგმის შემუშავებისა და განხორციელების, უწყებათაშორისი საქმიანობის კოორდინაციის, აგრეთვე შესაბამისი წინადადებებისა და დასკვნების შემუშავების მიზნით, საქართველოს იუსტიციის სამინისტროსთან შეიქმნა ნარკომანიის წინააღმდეგ ბრძოლის უწყებათაშორისი საკოორდინაციო საბჭო.
საკოორდინაციო საბჭოს შემადგენლობაში შედიან: საქართველოს იუსტიციის მინისტრი ზურაბ ადეიშვილი, რომელიც საკოორდინაციო საბჭოს თავმჯდომარეა, ასევე სასჯელაღსრულების, პრობაციისა და იურიდიული დახმარების საკითხთა მინისტრის მოადგილე გიორგი არსოშვილი, იუსტიციის მინისტრის პირველი მოადგილე თინა ბურჯალიანი, შინაგან საქმეთა სამინისტროს საპატრულო პოლიციის დეპარტამენტის დირექტორი გიორგი გრიგალაშვილი, შინაგან საქმეთა მინისტრის მოადგილე, სასაზღვრო პოლიციის უფროსი ზაზა გოგავა, შემოსავლების სამსახურის უფროსი ჯამბულ ებანოიძე, მთავარი პროკურორი მურთაზ ზოდელავა, შს მინისტრის პირველი მოადგილე ეკატერინე ზღულაძე, პარლამენტის იურიდიულ საკითხთა კომიტეტის თავმჯდომარის პირველი მოადგილე ჩიორა თაქთაქიშვილი.
საკოორდინაციო საბჭოს შემადგენლობაში ასევე შედიან: საქართველოს მთავარი პროკურატურის, შინაგან საქმეთა სამინისტროს გენერალურ ინსპექციაში, კრიმინალური პოლიციის, საპატრულო პოლიციის დეპარტამენტებში და სპეციალური ოპერატიული დეპარტამენტის ნარკოტიკების უკანონო ბრუნვის წინააღმდეგ ბრძოლის სამმართველოში გამოძიების საპროცესო ხელმძღვანელობის დეპარტამენტის უფროსი ბესარიონ თხელიძე, იუსტიციის სამინისტროს ანალიტიკური დეპარტამენტის უფროსი ოთარ კახიძე, უზენაესი სასამართლოს თავმჯდომარის პირველი მოადგილე ზაზა მეიშვილი, იუსტიციის სამინისტროს საერთაშორისო საჯარო სამართლის დეპარტამენტის უფროსის მოადგილე, საკოორდინაციო საბჭოს მდივანი ბაბუცა პატარაია, შრომის, ჯანმრთელობისა და სოციალური დაცვის მინისტრი ალექსანდრე ურუშაძე, განათლებისა და მეცნიერების მინისტრის მოადგილე ირინე ქურდაძე, პარლამენტის თავმჯდომარის მოადგილე გიორგი წერეთელი, შინაგან საქმეთა სამინისტროს სპეციალური ოპერატიული დეპარტამენტის დირექტორი დევი ჭელიძე.
საკოორდინაციო საბჭოს მუშაობაში მონაწილეობა ეთხოვათ: ევროპის საბჭოს ოფისის ხელმძღვანელს საქართველოში კატერინა ბოლონიეზეს, სააქციო საზოგადოება „ნარკოლოგიის სამეცნიერო კვლევითი ინსტიტუტის" გენერალური დირექტორის მოადგილეს ირაკლი გამყრელიძეს, ევროკავშირის წარმომადგენლობის ხელმძღვანელს საქართველოში ფილიპ დიმიტროვს, ამერიკის შეერთებული შტატების საელჩოს იურიდიულ მრჩეველს ჯარედ კიმბოლის, გაეროს ბავშვთა ფონდის წარმომადგენელს საქართველოში რულანდ მონაშს და ამერიკის შეერთებული შტატების საერთაშორისო განვითარების სააგენტოს საქართველოს მისიის დირექტორს სტივენ ჰეიკინს.
ბრძანებულება უკვე ძალაშია შესული.
