აშშ-ის ელჩის მოადგილე ბრიჯიტ ბრინკი თბილისის მოსწავლე ახალგაზრდობის სასახლეში ამერიკული კუთხის მეხუთე წლისთავისადმი მიძღვნილ საზეიმო ღონისძიებას დაესწრო.
განვლილი 5 წლის განმავლობაში, ამერიკულმა კუთხემ, აშშ-ის საელჩოსთან ერთად, ამერიკული ლიტერატურის, მუსიკის, კლასიკური ფილმებისა და მოწვეულ სპიკერთა დახმარებით, აგრეთვე საზაფხულო სკოლებისა და მრავალფეროვანი ღონისძიებების საშუალებით, ხელი შეუწყო ახალგაზრდებს, უკეთ გაეცნოთ ამერიკელი ხალხი და ამერიკული კულტურა. ამ ხუთ წელიწადში, თბილისის ამერიკულ კუთხეს 32 ათასი სტუმარი ეწვია, მათ შორის აშშ-ის ვიცე-პრეზიდენტი ჯო ბაიდენი. ამერიკული კუთხეები განთავსებულია საქართველოს 8 ქალაქში: ახალციხეში, ბათუმში, გორში, ხაშურში, რუსთავში, თელავში, თბილისსა და ზუგდიდში. მე-9 ამერიკული კუთხე ქუთაისში გაიხსნება.
ამასთან, ელჩი ბასი აცხადებს კონკურსს 15-25 წლის ახალგაზრდებისთვის აშშ-ის საელჩოს საგანგებო ლოგოს შესაქმნელად, რომელიც აშშ-ისა და საქართველოს მეგობრობის 20 წლისთავს მიეძღვნება. გაისად ამერიკის საელჩო საქართველოსთან დიპლომატიური ურთიერთობების დამყარების 20 წლისთავს მთელი რიგი ღონისძიებებით აღნიშნავს.
