წმინდა მოციქულ ფილიპეს ხსენების დღეს სრულიად საქართველოს კათალიკოს-პატრიარქი ილია მეორე კიდევ 560 ბავშვის ნათლია გახდა. ყოვლადწმინდა სამების საკათედრო ტაძარში ჩვილთა მე-20 საყოველთაო ნათლობა გაიმართა.
ნათლობის ბოლოს ტაძარში უწმინდესი მიბრძანდა და ნათლულები დალოცა. ახლად მონათლულებმა უწმინდესისგან საჩუქრად სანთლები და სახარება მიიღეს.
სრულიად საქართველოს კათალიკოს-პატრიარქი ყველა ჯვარდაწერილი ოჯახის მე-3 და მომდევნო შვილებს უკვე მესამე წელია ნათლავს. ჩვილთა პირველი ნათლობა ყოვლადწმინდა სამების საკათედრო ტაძარში 2008 წლის 19 იანვარს შედგა. ამ დროისთვის უწმინდესი უკვე 10 000-ზე მეტი ბავშვის ნათლიაა.
