თბილისის მერი გიგი უგულავა ბიძინა ივანიშვილის ერთ-ერთი სამშენებლო კომპანიიდან მლესავის განთავისუფლების გამო მწუხარებას გამოთქვამს. ამის შესახებ ნათქვამია განცხადებაში, რომელიც „ჯი-ეიჩ-ენს" თბილისის მერიიდან აცნობეს.
„თბილისის მერი პროექტ „დაგეგმე ბიუჯეტი მერიასთან ერთად" ფარგლებში, 11 ნოემბერს სტუმრად იმყოფებოდა ხუხუების ოჯახში. პროექტის მიხედვით, თბილისის თვითმმართველობისა და მმართველობის ორგანოების წარმომადგენლები ყოველდრიურად შეხვედრებს მართავდნენ მოსახლეობასთან, რათა მათთან ერთად სწორედ განესაზღვრად 2012 წლის ბიუჯეტის პრიორიტეტები. სწორედ ერთ-ერთი ასეთი სახის შეხვედრა შედგა თბილისის მერსა და ზაზა ხუხუას ოჯახს შორის, რაც ტელევიზიით გაშუქდა. შეხვედრიდან რამოდენიმე დღეში ზაზა ხუხუა გათავისუფლებულ იქნა სამსახურიდან. ზაზა ხუხუა ბიძინა ივანიშვილის ერთ-ერთ სამშენებლო კომპანიაში მლესავად მუშაობდა და ეს ფაქტი ჩვენთვის მხოლოდ სამაუწყებლო კომპანია „რუსთავი2"-ის ეთერში გასული სიუჟეტის შემდეგ გახდა ცნობილი", - აღნიშნულია განცხადებაში.
განცხადების თანახმად, თბილისის მერი ესაუბრა დაზარალებულს, გაამხნევა, მხარდაჭერა და მორალური თანადგომა აღუთქვა მას.
„მიგვაჩნია, რომ ადამიანის სამსახურიდან გათავისუფლების ამგვარი ფორმა სცილდება ადამიანურ სტანდარტებს, რაც ძალიან დასანანია. ჩვენი აზრით სამსახურში აყვანა და გათავისუფლება პოლიტიკური ნიშნით არ უნდა ხდებოდეს. ჩვენთვის ნებისმიერი სამუშაო ადგილი ძვირფასია და დაუშვებლად მიგვაჩნია რომ ადამიანს, რომელსაც ოჯახი და შვილები ჰყავს ამგვარად მოექცნენ. იმედი გვაქვს, რომ მომავალში მსგავსი ფაქტები აღარ განხორციელდება, ხოლო ზაზა ხუხუას მხარდაჭერასა და თანადგომას ვუცხადებთ", - ნათქვამია განცხადებაში.
