"ევროპაში ჩვენების დროს ყოველთვის ცოცხლად შესრულება ხდება. მემგონი კარგი გამოვიდა, ყველას მოეწონა და ყველა ცეკვავდა. სიმღერა მანამდე შეიქმნა და მერე დავუკავშირეთ ერთმანეთს. ძალიან მომწონს გოლას ტანსაცმელი", - განაცხადა სალომე კორკოტაშვილმა.

თავად დიზაინერი მიიჩნევს, რომ სალომეს მუსიკამ მისი კოლექცია ბოლომდე შეკრა და ის მუხტი გადასცა ხალხს რაც მას სურდა ეთქვა.

"ყველაზე მთავარი კორკოტას LIVE იყო, რომელმაც დაასრულა და შეკრა ბოლომდე ჩემი კოლექცია. ჩემი სამოსის ფერები თამამი იყო, სადაც სტაფილოსფერი, მწვანე, თეთრი და შავი დომინირებდა. აგრესიულობისთვის ღამურა გამოვიყენე და მისი თავები გავუკეთე მოდელებს. ამ კოლექციაზე ორი თვე ვმუშაბდი", - განაცხადა დიზაინერმა გოლამ.

"ძალიან მომეწონა გოლას ნამუშევრები. ძალიან ელეგანტური, ქალური და ლამაზი იყო. ზოგადად ძალიან მომწონს მოდის კვირეულები, იმიტომ რომ ეს სფერო ვითარდება და ჩვენი დიზაინერებისთვის სტიმულიც არის. ჯერჯერობით რაც ვნახე მათგან მომეწონა გოლა და გუდუ", - აღნიშნა ლიკა ევგენიძემ.

თბილისის მოდის კვირეულზე კოლექცია ოთხმა დიზაინერმა წარადგინა. ეთი'ს (ეთი კონჭოშვილი), გოლა, ტატუნა ნიკოლაიშვილი და გიორგი ამირეჯიბი მოდის კვირეულზე კოლექციის წარსადგენად რამდენიმე თვე მუშაობდნენ. როგორც თავად კვირეულის ორგანიზატორმა, თაკო ჩხეიძემ "ჯი-ეიჩ-ენთან" განაცხადა ყველას ფორსმჯორულ სიტუაციაში უწევდა მუშაობა.

"არ არის დასამალი, რომ ძალიან ფორსმაჟორში გვიწევს მუშაობა. ბევრი პრობლემები გვაქვს. თუ ამ ყველაფერს გადავხედავ, რა პირობებში გვიწევს მუშაობა მაშინ გეტყვით, რომ ძალიან კმაყოფილი ვარ. ბევრ უცხოელს, რომ მოუყვე რა პირობებში ვმუშაობთ და მერე რას ვაკეთებთ არ დაიჯერებს. მე უფრო მეტი მინდა გავაკეთო, ამით არ ვკმაყოფილდები. მაგრამ ამ ეტაპზე კმაყოფილი ვარ, დიზაინერები იზრდებიან. ჩემი შეხედულება მაქვს ზოგიერთი არ მომწონს, ზოგი მომწონს, მაგრამ საბოლოო ჯამში კმაყოფილი ვარ", - განაცხადა თაკო ჩხეიძემ.

თბილისის მოდის კვირეული 24 ნოემბერს გაიხსნა და 27-მდე გაგრძელდება. მასში მონაწილეობას იღებენ, როგორც საქართველოში ასევე, საზღვარგარეთ მოქმედი დიზაინერები. მოდის კვირეული დათუნა სულიკაშვილის კოლექციის ჩვენებით დასრულდება.