საქართველოს პრემიერ-მინისტრ ნიკოლოზ გილაურის შეფასებით, მაკროეკონომიკური პარამეტრების მიხედვით საქართველო მსოფლიოში ერთ-ერთი ყველაზე ჯანსაღი ქვეყანაა. ამის შესახებ განცხადება გილაურმა პარლამენტში გამართული პოლიტიკური დებატებისას გააკეთა.
"მაკროეკონომიკური პარამეტრები მნიშვნელოვანია იმისთვის, რომ ქვეყანაში სამუშაო ადგილები შეიქმნას. ავიღოთ, მაგალითად, თუნდაც საბერძნეთი, თუნდაც სხვა ქვეყნები, რომლებიც კრიზისში შევიდნენ, რა ხდება იქ? იქ სინამდვილეში ხდება სამუშაო ადგილების დაკარგვა. ხდება ის, რომ ქვეყანას არ შეუძლია თავისი ვალდებულებების გასტუმრება. იქ ხდება ის, რომ პენსიებს ვერ ისტუმრებენ, ვერ ისტუმრებენ ჩვეულებრივ ხელფასებს, ჩამოიშალა ეკონომიკა, ჩამოიშალა კერძო სექტორი და შედეგად მივიღეთ ძალიან რთული მდგომარეობა საბერძნეთში. მივიღეთ სწორედ იმიტომ, რომ მაკროეკონომიკური პარამეტრები არ იყო სწორი, არ იყო ჯანსაღი", - აცხადებს გილაური.
საქართველო კი, გილაურის მსოფლიოში საუკეთესო მდგომარეობაშია.
"ჩვენ ვართ წელს ერთადერთი ეკონომიკა, რომელმაც გაზარდა პროგნოზი 5,5%-იდან 6%-მდე, მაგრამ ახლავე გეუბნებით, რომ ეს უფრო პესიმისტური პროგნოზია და ამაზე უფრო მაღალი ზრდა გვექნება, რადგან ათთვიანი ზრდა გვაქვს 6,5% და შესაბამისად, უფრო მაღალი გვექნება. მომავალ წელს გვექნება ეკონომიკის 5%-იანი ზრდა და ამაში სავალუტო ფონდიც გვეთანხმება, მიუხედავად მსოფლიო პრობლემებისა", - აღნიშნა გილაურმა.
რაც შეეხება საბანკო სექტორს, გილაურის თქმით, რეკორდულად მაღალი დეპოზიტები გვაქვს და რეკორდულად მაღალი საკრედიტო პორტფელი.
"საერთაშორისო რეზერვებიც ეროვნულ ბანკს რეკორდულად მაღალი აქვს და ინფლაცია 2,5%-ია", - აცხადებს გილაური.
