საქართველოს ფინანსთა სამინისტროსა და სახელმწიფო ხაზინის ორგანიზებით, სასტუმრო „ქორთიარდ მარიოტში" გაიმართა სემინარი თემაზე: „საჯარო სექტორის საერთაშორისო ბუღალტრული სტანდარტების (IPSAS) დანერგვა საქართველოში." სემინარი გახსნა და მონაწილეებს მისასალმებელი სიტყვით მიმართა საქართველოს ფინანსთა მინისტრმა დიმიტრი გვინდაძემ.
50-ზე მეტი საბიუჯეტო ორგანიზაციის წარმომადგენელსა და ფინანსურ მენეჯერს IPSAS-ის სტანდარტები ბრიტანელმა ექსპერტმა უეინ ბარტლეტმა გააცნო.
საერთაშორისო ბუღალტრული სტანდარტი (IPSAS)საერთაშორისოდ აღიარებულ ბიუჯეტის ანგარიშგების სტანდარტია, რომელიც ძირითადად, ორიენტირებულია ბიუჯეტის ტრანსფარენტულობაზე და საჯაროობაზე.
„დღევანდელი შეხვედრის მიზანია, მხარჯავ სუბიექტებს გავაცნოთ რეფორმები, რომელიც ხორციელდება ხაზინაში. ვიმსჯელოთ იმაზე, რა შეიძლება კიდევ გაკეთდეს იმისთვის, რომ უკეთ იმუშაოს ხაზინამ და გაიმართოს ის მომსახურება, რომელსაც სახაზინო სამსახური აწვდის სხვადასხვა მხარჯავ სუბიექტს,-განაცხადა ფინანსთა მინისტრმა დიმიტრი გვინდაძემ. მისი თქით, სემინარზე განიხილება რა დინამიკითა და ქრონოლოგიით უნდა დაინერგოს სახელმწიფო სექტორში თანამედროვე საბუღალტრო აღრიცხვის სტანდარტები. „აღნიშნული სტანდარტების დანეგრვა საშუალებას მოგვცემს გავზარდოთ სახელმწიფო ფინანსების გამჭირვალობის დონე, რაც მნიშვნელოვანია იმისთვის, რომ შევინარჩუნოთ ფისკალური მდგრადობა, რადგან სწორედ ამას უყურებენ ინვესტორები და ბიზნესმენები, რომლებიც აბანდებენ სახსრებს საქართველოში," - განაცხადა მინისტრმა.
როგორც დიმიტრი გვინდაძემ აღნიშნა, ბოლო წლებში ხაზინაში ბევრი რამ გაკეთდა რეფორმების კუთხით. დაინერგა ხაზინის ერთიანი ანგარიში. განხორციელებული რეფორმებიდან ერთ-ერთი ყველაზე წარმატებულია ელექტრონული მომსახურების სისტემის (ელექტრონული ხაზინის) დანერგვა, რომლის ანალოგი სრელად ამ ეტაპზე პოსტსაბჭოთა სივრცის არც ერთ ქვეყანაში არ არის დანერგილი.
„ვმუშაობთ იმაზე, რომ დაინერგოს სახელმწიფო ფინანსების ინტეგრირებული სისტემა, რაც პირდაპირ უკავშირდება სახელმწიფო ფინანსების გამჭირვალობას, საბიუჯეტო დაგეგმვის პროცესის გამართულ მუშაობას. ხაზინის რეფორმაში ერთ-ერთი მნიშვნელოვანი პრიორიტეტია ხაზინის ერთიანი წიგნის დანერგვა, რაც საშუალებას მოგვცემს, რეალურ დროში დავინახოთ და ვმართოთ მთავრობის აქტივები და პასივები. ეს გრძელვადიანი პროექტია, რომელსაც ფინანსთა სამინისტრო დონორ ორგანიზაციებთან ერთად ახორციელებს," - განაცხადა მინისტრმა.
აღრიცხვის რეფორმა (IPSAS) საერთაშორისო სტანდარტებზე ეტაპობრივ გადასვლას ითვალისწინებს.
საერთაშორისო სტანდარტების საფუძველზე მომზადებული ფინანსური ანგარიშები უზრუნველყოფს: სახელმწიფო სახსრების ხარჯვის გამჭვირვალობის ზრდას; სახელმწიფოს ფინანსური ანგარიშგების მიმართ ნდობის ამაღლებას, როგორც საზოგადოებაში, ასევე უცხოელ ინვესტორებში.
აღნიშნული რეფორმა, რომელიც მსოფლიო ბანკის მხარდაჭერით ხორციელდება, წარმოადგენს ახალ მიმართულებას მსოფლიოს სახელმწიფო ფინანსების სფეროში და საქართველო ერთ-ერთი მოწინავე ქვეყანაა, ავსტრალიასთან, დიდ ბრიტანეთთან, ახალ ზელანდიასა და დასავლეთ ევროპის რამდენიმე ქვეყანასთან ერთად.
სახელმწიფო სექტორის ფინანსების მართვის პროცესში ფინანსთა სამინისტროს სახელმწიფო ხაზინა ერთ-ერთ უმნიშვნელოვანეს რგოლს წარმოადგენს. სახელმწიფო ხაზინას სრულად ეკისრება პასუხისმგებლობა ბიუჯეტის შესრულებაზე, სახელმწიფო ფულადი სახსრების ეფექტურ და ორგანიზებულ მართვაზე. ბოლო წლებში სახელმწიფო ხაზინა, ისევე როგორც ყველა ფისკალური ინსტიტუტი, ჩართულია სახელმწიფო ფინანსების მართვის რეფორმების მასშტაბურ პროცესში. რეფორმების ძირითადი მიზანია, საბიუჯეტო სახსრების განკარგვა მაქსიმალურად ეფექტურად, მარტივად და უსაფრთხოდ, რაც თავისთავად ხელს უწყობს სახელმწიფო სექტორის მუშაობის ეფექტურობის ამაღლებას, ოპერატიულობას და გამჭვირვალობას. ამასთან, იზრდება საბიუჯეტო ორგანიზაციების ანგარიშვალდებულება, ვინაიდან ხდებაბიუჯეტის ხარჯების დანიშნულების შესახებ დეტალური ინფორმაციების განთავსება ელექტრონულ საინფორმაციო სისტემაში, შესაბამისად, მარტივად ხელმისაწვდომი და აბსოლუტურად გამჭვირვალეა.
