საქართველოს ეკონომიკისა და მდგრადი განვითარების მინისტრმა ქართული ალკოჰოლური და არაალკოჰოლური სასმელების გამოფენა-ფორუმი Trade With Georgia 2011 - Tradeshow and B2B Forum (TWG 2011) გახსნა. ღონისძიების გახსნითი ნაწილი სასტუმრო "ჰოლიდეი ინ"-ში შედგა, სადაც ფორუმში მონაწილე ქართული კომპანიების გარდა 80-მდე უცხოელი სტუმარიც შეიკრიბა, მათ შორის თრეიდერები, ღვინის ექსპერტები და ჟურნალისტები.
მხოლოდ აზიიდან საქართველოს 43 დელეგატი (ჩინეთი, სამხრეთ კორეა, სინგაპური, იაპონია, ტაივანი) ეწვია. მინისტრმა მისასალმებელი სიტყვით მიმართა ფორუმის მონაწილეებს, სადაც საქართველოში ეკონომიკის ამ დარგის ტრადიციებზე, მნიშნველობასა და პერსპექტივებზე ისაუბრა. ამასთან, ღონისძიებასთან დაკავშირებით ვერა ქობალიამ კომენტარი გააკეთა მედიისთვის, სადაც აღნიშნა, რომ დღეს აზიის ბაზარი ყველაზე ზრდადი ბაზარია მსოფლიოში და საქართველოსთვის აუცილებელია, რომ ღვინის ექსპორტი დივერსიფიცირებული იყოს.
"მნიშვნელოვანია, ღვინო გაგვქონდეს არამხოლოდ ევროპის ბაზარზე, სადაც ჩვენი ექსპორტის 22% გაგვაქვს, არამედ მთელ მსოფლიოში და არ ვიყოთ დამოკიდებული მხოლოდ ერთ ბაზარზე. ეს აუცილებელია იმისთვის, რომ თუ ევროპაში ან მსოფლიოს რომელიმე ქვეყანაში კრიზისი იქნება, ჩვენ ყოველთვის გვექნება მდგრადი განვითარება ღვინის გაყიდვების მხრივ" - განაცხადა ვერა ქობალიამ.
ღონისძიება ტარდება საქართველოს ეროვნული საინვესტიციო სააგენტოს ექსპორტის ხელშეწყობის სამსახურის ორგანიზებით, ეკონომიკისა და მდგრადი განვითარების სამინისტროს პატრონაჟით და წარმოადგენს უპრეცენდენტო მასშტაბის ფორუმს ქართული სასმელების პოპულარიზაციის კუთხით. დამსწრე საზოგადოებას ასევე სიტყვით მიმართა ფორუმის საპატიო სტუმარმა სინგაპურის ერთადერთი ღვინის მაგისტრმა ლიზა პეროტი ბრაუნმა.
დღესვე "ექსპო ჯორჯია"-ში ვერა ქობალიამ ოფიციალურად გახსნა Trade With Georgia 2011 გამოფენა-ფორუმი. საგამოფენო პავილიონში წარმოდგენილია ალკოჰოლური და არაალკოჰოლური სასმელების მწარმოებელი 60-ზე მეტი ქართული კომპანია, მათ შორის ქვევრის ღვინის მწარმოებელი. ფორუმის ფარგლებში დაგეგმილია სასმელების დეგუსტაცია ექსპერტების მიერ და ასევე ინდივიდუალური შეხვედრები ქართული კომპანიების წარმომადგენლებსა და უცხოელ თრეიდერებს შორის.
26 ნოემბერს დაგეგმილია ფორუმის უცხოელი სტუმრების ტური კახეთში, სადაც ისინი ესტუმრებიან წინანდლის მუზეუმსა და ვინოთეკას, ამასთანავე მოინახულებენ რამდენიმე ქართული ღვინის მწარმოებლის მარნებს და ადგილზე დააგემოვნებენ ღვინოს.
მასალის გამოყენების პირობები