საქართველოს მთავრობა აცხადებს ინტერესთა გამოხატვას ნამახვანის ჰესების კასკადის პროექტის განხორციელების მიზნით. მშენებლობის, ფლობისა და ოპერირების უფლებით. ენერგეტიკისა და ბუნებრივი რესურსების სამინისტროს ინფორმაციით, კასკადის დადგმული სიმძლავრეა - 450 მგვტ, საშუალო წლიური გამომუშავება - 1600 გვტსთ, ხოლო სავარაუდო საინვესტიციო ღირებულება - 850 მლნ. აშშ დოლარი.
საერთაშორისო კომპანიების მიერ მომზადებული სრული ტექნიკურ-ეკონომიკური დასაბუთების, ასევე გარემოზე და სოციალური ზემოქმედების შეფასების ანგარიშების თანახმად ნამახვანის კასკადის პროექტის განხორციელება მისაღებია როგორც ტექნიკური, ასევე ეკონომიკური და ეკოლოგიური თვალსაზრისით.
სამინისტროში განმარტავენ, რომ საქართველო ევროპაში ერთ-ერთი ქვეყანაა აუთვისებელი ჰიდრორესურსების დიდი პოტენციალის თვალსაზრისით. რეგიონში არსებული სწრაფად მზარდი მოთხოვნილება ელექტროენერგიაზე, განახლებადი ენერგიის წყაროების ათვისების პრიორიტეტულობა და არსებული მიმზიდველი საინვესტიციო გარემო მყარ საფუძველს ქმნის საქართველოს ჰიდროენერგეტიკულ სექტორში კერძო ინვესტიციების განხორციელებისათვის.
