70-მდე სატვირთო ავტომობილმა ზემო ლარსის გადასასვლელზე საცობი შექმნა. სატრანზიტო ტვირთი უკვე ათ დღეზე მეტია სომხეთამდე ვერ მიდის. ინფორმაციას ამის შესახებ ოსური მედია ავრცელებს.
"სატრანზიტი ტვირთი სომხეთში უკვე ათი დღეა ვერ ხვდება. საქართველომ საზღვრის თავის მონაკვეთზე მოძრაობა შეზღუდა. რუსეთის სასაზღვრო სამსახურში აცხადებენ, რომ მსგავს ქმედებებს შესაძლოა ჰქონდეს ადგილი ზამთრის პერიოდში რთული ბუნებრივი პირობების გამო", _ იუწყება ოსური მედია და აღნიშნავს, რომ მიუხედავად ამისა, სხვადასხვა კომერციული ორგანიზაციის მანქანები საზღვარს მაინც კვეთენ. სხვა ფირმების მძღოლები ამით შეშფოთებულნი არიან. ისინი უკვე რამდენიმე დღეა ცივ მანქანებში ცხოვრობენ. თუმცა მათ ყველაზე მეტად გაურკვევლობა აწუხებთ - არ იციან, როდის გაიხსნება მათთვის საზღვარი.
"თოვლი უკვე მოდის და თუ ჯვრის უღელტეხილი თოვლისგან ჩაიკეტა, მართლაც გაურკვეველი იქნება, თუ რამდენი ხნით მოუწევთ აქ ყოფნა. ახლა ყველაფერი ქართული მხარის სურვილზეა დამოკიდებული", _ აცხადებს რუსეთის ჩრდილოეთ ოსეთის მიმართულების "ეფ-ეს-ბეს" სასაზღვრო სამმართველოს უფროსი სერგეი დოროფეევი.
