2011 წლის იანვარ-ოქტომბერში, უმსხვილეს საიმპორტო სასაქონლო ჯგუფად ნავთობი და ნავთობპროდუქტები რჩება, რომლის იმპორტმა 739 მლნ. აშშ დოლარი და მთელი იმპორტის 13 პროცენტი შეადგინა. "საქსტატის" ინფორმაციით, მეორე ადგილზე იმყოფებოდა მსუბუქი ავტომობილების სასაქონლო ჯგუფი 322 მლნ. აშშ დოლარით, რაც იმპორტის 6 პროცენტი იყო. მესამე ადგილზე ნავთობის აირები და აირისებრი ნახშირწყალბადების ჯგუფი დარჩა 190 მლნ. აშშ დოლარით (იმპორტის 3 პროცენტი).
"საქსტატის" ინფორმაციით, 2011 წლის იანვარ-ოქტომბერში ათი უმსხვილესი სავაჭრო პარტნიორის წილმა საქართველოს მთლიან საგარეო სავაჭრო ბრუნვაში 67 პროცენტი შეადგინა. უმსხვილეს სავაჭრო პარტნიორებად კვლავ თურქეთი (1217 მლნ. აშშ დოლარი), აზერბაიჯანი (792 მლნ. აშშ დოლარი) და უკრაინა (691 მლნ. აშშ დოლარი) რჩება.
შეგახსენებთ, რომ 2011 წლის იანვარ-ოქტომბერში საქართველოს საგარეო სავაჭრო ბრუნვამ (არაორგანიზებული ვაჭრობის გარეშე) 7322 მლნ. აშშ დოლარი შეადგინა, რაც წინა წლის ანალოგიურ მაჩვენებელზე 39 პროცენტით მეტია; აქედან ექსპორტი 1739 მლნ. აშშ დოლარი იყო (42 პროცენტით მეტი), ხოლო იმპორტი - 5583 მლნ. აშშ დოლარი (38 პროცენტით მეტი). საქართველოს უარყოფითმა სავაჭრო ბალანსმა 2011 წლის იანვარ-ოქტომბერში 3845 მლნ. აშშ დოლარი შეადგინა (36 პროცენტით მეტი).
