„საქართველოს ფერმერთა სახლი" კახეთის რეგიონში მიწის განოყიერების მიზნით ჭიაყელების გამრავლებას გეგმავს. როგორც „ფერმერთა სახლის" გამგეობის თავმჯდომარე ვახტანგ ქიზიყურაშვილმა კახეთის საინფორმაციო ცენტრს განუცხადა, ამ მიზნით, გურჯაანის რაიონის სოფელ ველისციხეში უკვე გაიხსნა ჭიაყელების მოსამრავლებელი ინკუბატორი.
„ჩვენ გვაქვს შოთა რუსთაველის სახელობის სამეცნიერო ფონდის მიერ დაფინანსებული პროექტი, რომლის ფარგლებშიც სამეცნიერო ნაშრომი მომზადდა იმაზე, თუ რამდენად სასარგებლოა ჭიაყელა ნიადაგისთვის. დღეს, ჩვენ შხამ-ქიმიკატებით მოყვანილ პროდუქციას ვჭამთ. არადა, შეიძლება, რომ ჭიაყელას საშუალებით, სასუქების და შხამ-ქიმიკატების გარეშე გავანოყიეროთ მიწა და ვჭამოთ ეკოლოგიურად სუფთა პროდუქტი. პროექტის ფარგლებში სოფელ ველისციხეში გაიხსნა პირველი ინკუბატორი, სადაც კალიფორნიული წითელი ჯიშის ჭიაყელებს ვამრავლებთ, მაგრამ ეს საკმარისი არ არის," - განუცხადა ქიზიყურაშვილმა კახეთის საინფორმაციო ცენტრს.
მისივე თქმით, ჭიაყელების მომრავლებას საკმაოდ დიდი თანხა სჭირდება, თუმცა საჭირო ფინანსების მოძიება ჯერჯერობით ვერ მოხერხდა.
„აუცილებელია, რომ მსგავსი ინკუბატორები სხვა რაიონებშიც გაიხსნას, ამისთვის კი საკმაოდ დიდი თანხებია საჭირო. ამ პროექტის განსახორციელებლად ინვესტორების მოძიება ან სახელმწიფოს ფინანსური მხარდაჭერა გვჭირდება, მაგრამ სახელმწიფო გაჩუმებულია, რადგან ასფალტის დაგება უფრო აინტერესებთ," - აღნიშნა ქიზიყურაშვილმა.