დღეს, 21 ნოემბერს დაძმობილების პროექტის „ეკონომიკური საზღვრის კვეთისა და სანიტარული-ფიტოსანიტარული სასაზღვრო კონტროლის სისტემის გაძლიერება საქართველოში“ პრეზენტაცია გაიმართა ევროკავშირმა დაძმობილების პროექტის ფარგლებში შემოსავლების სამსახურს 1.8 მილიონი ევრო (4.1 მილიონი ლარი) გამოუყო. დაძმობილების პროექტი ითვალისწინებს ევროპული მეზობლობისა და პარტნიორობის წევრი ქვეყნების ინსტიტუციონალურ განვითარებას და მხარდაჭერას. პრეზენტაციას დაესწრნენ საქართველოში ევროკავშირის მისიის ხელმძღვანელის მოადგილე ბორის ირაოშევიჩი, ესტონეთის ელჩი ტუმას ლუკ, იტალიის ელჩი ფედერიკა ფავი და დანიის საპატიო კონსული ესბენ ემბორგი, შემოსავლების სამსახურის უფროსის მოადგილე ლილი ბეგიაშვილი და სხვა სტუმრები. საქართველოს ფინანსთა მინისტრის დიმიტრი გვინდაძის განცხადებით, დაძმობილების პროექტის მიზანია, საქართველოში ეკონომიკური საზღვრის გადაკვეთისა და ფიტოსანიტარულ-სასაზღვრო კონტროლის სისტემის გაძლიერება. „მთავრობის ათპუნქტიანი გეგმის მიხედვით, საქართველოს რეგიონის სავაჭრო და ლოჯისტიკურ ცენტრად ჩამოყალიბებას დიდი მნიშვნელობა ენიჭება. ამ მხრივ, ძალიან მნიშვნელოვანია ევროკავშირთან სავაჭრო ურთიერთობების დამყარება. მოგეხსენებათ, რომ ევროკავშირთან ასოცირების ხელშეკრულების შესახებ მოლაპარაკებები საკმაოდ კარგი დინამიკით მიდის, მისი ერთ-ერთი საკვანძო თავი კი ღრმა და ყოვლისმომცვლელი თავისუფალი სავაჭრო ხელშეკრულების გაფორმებაა, რომლის განხილვის დაწყებას სავარაუდოდ, წელს მოვახერხებთ“, - განაცხადა ფინანსთა მინისტრმა. შემოსავლების სამსახურის უფროსის მოადგილის ლილი ბეგიაშვილის განცხადებით, აღნიშნული პროექტის განხორციელებას უდიდესი მნიშვნელობა ენიჭება ევროკავშირთან თავისუფალი ვაჭრობის ხელშეკრულების გაფორმების საკითხში. „დღეს ძალიან მნიშვნელოვანი ერთობლივი პროექტი დავიწყეთ, რაც გულისხმობს ეკონომიკური საზღვრის გადაკვეთისა და სანიტარული კონტროლის გაძლიერებას. იმისათვის, რომ იყოს თავისუფალი ვაჭრობა, საჭიროა უფრო კარგად გაკონტროლდეს ტვირთები“, - აღნიშნა საქართველოში ევროკავშირის მისიის ხელმძღვანელის მოადგილემ ბორის ირაოშევიჩმა. პროექტის ძირითადი განმახორციელებელი ქვეყანაა დანია (დანიის ცენტრალურ საგადასახადო და ეკონომიკური საზღვრის დაცვის ადმინისტრაცია, დანიის ვეტერინარიისა და სურსათის ადმინისტრაცია), ხოლო ესტონეთი (ესტონეთის საგადასახადო და ეკონომიკური საზღვრის დაცვის საბჭო, ესტონეთის ვეტერინარიის და სურსათის საბჭო) და იტალია (იტალიის ეკონომიკური საზღვრის დაცვის სააგენტო) უმცროსს პარტნიორ ქვეყნებს წარმოადგენენ. დაძმობილების პროექტი შედგება ორი ძირითადი კომპონენტისგან, ეკონომიკური საზღვრის კვეთის კონტროლი, სანიტარული და ფიტოსანიტარული კონტროლი. პროექტი ხელს შეუწყობს შემოსავლების სამსახურის პოლიტიკის, ორგანიზაციული სტრუქტურისა და ეკონომიკური საზღვრის გადაკვეთის პროცედურების ადმინისტრაციული შესაძლებლობებისა და მდგრადობის გაუმჯობესებას. აღნიშნულ კომპონენტში შემავალი ღონისძიებები ჩამოყალიბდა სამ ქვეკომპონენტად, რაც მოიცავს საკანონმდებლო, ეკონომიკური საზღვრის გადაკვეთის კონტროლის და ტრეინინგების სფეროებს. პროექტით გათვალისწინებული ღონისძიებები ხორციელდება იტალიელი, ესტონელი და დანიელი ექსპერტების მიერ. ღონისძიებები გაიმართება ცენტრალურ, რეგიონალურ და ადგილობრივ დონეზე (საზღვაო პორტის, აეროპორტის და სახმელეთო პორტალები). სანიტარული და ფიტოსანიტარული კომპონენტის მიზანია საქართველოს საზღვარზე ვეტერინარული და მცენარეთა ჯანმრთელობის კონტროლის გაუმჯობესება. ევროკავშირის დაძმობილების პროექტის ფარგლებში, დანიის და ესტონეთის წარმომადგენლების მიერ ქართველი ვეტერინარი და მცენარეთა დაცვის ოფიცრებისათვის განხორციელდება სასწავლო ვიზიტები, სემინარები და პრაქტიკული სამუშაო შეხვედრები. შემოსავლების სამსახურის თანამშრომელთა პირველი სასწავლო ვიზიტი დანიაში ნოემბრის დასაწყისში შედგა. შემდეგი ვიზიტი ესტონეთში ნოემბრის დასასრულს იგეგმება.