საქართველო-რუსეთის ბიზნესგავითარების საბჭო რუსეთის ბაზარზე ქართული ციტრუსის დაბრუნების ინიციატივით გამოდის. ამის შესახებ საბჭოს დამფუძნებელ სხდომაზე საქართველო-რუსეთის ბიზნესგავითარების საბჭოს თავმჯდომარემ, დავით ზოდელავამ განაცხადა და დასძინა, რომ საბჭოს მიზანი ქართულ-რუსული ეკონომიკური ურთიერთობების ხელშეწყობაა.
"გვინდა ჩვენი წვლილი შევიტანოთ ორ ქვეყანას შორის ტრადიციული პარტნიორობის მხარდაჭერაში. პირველ ეტაპზე ვიმუშავებთ ციტრუსების გატანის საკითხზე. ვფიქრობთ, ჩამოვაყალიბოთ ლაბორატორია და შევქმნათ საკანონმდებლო ბაზა მისი ნორმალური ფუნქციონირებისთვის. მსოფლიოში არაერთი მაგალითია, როდესაც ქვეყნებს შორის არსებული პოლიტიკური დაძაბულობის მიუხედავად, მათ შორის სავაჭრო ურთიერთობები არათუ წყდება, არამედ ვითარდება", - განაცხადა ზოდელავამ და დასძინა, რომ ამ პროგრამით არა ცალკე ბიზნესსტრქუტურა არამედ საქართველოს მოსახლეობის მნიშვნელოვანი ნაწილი იხეირებს.
მისი თქმით, საბჭომ რუსეთის შესაბამის ორგანოებს უკვე მიმართა ციტრუსის რუსულ ბაზარზე დაბრუნების თხოვნით. როგორც ზოდელავამ აღნიშნა, მას იმედი აქვს უწმინდესის, რომელს ვიზიტიც მოსკოვში დღეს დაიწყო.
"პატრიარქის მოსკოვში ვიზიტი დღეს იწყება. ჩვენ მას მივმართავთ თხოვნით, რომ ეს საკითხი ვიზიტის დროს წინ წამოწიოს", - აღნიშნა ზოდელავამ.
სხდომას რამდენიმე ქართველი ფერმერი, რუსული კომპანია "გრანტ ტრეიდის" წარმომადგენლები და სააქართველოში შვეიცარიის საელჩოს რუსეთის ინტერესთა სექციის ხელმძღვანელი ანდრეი სმაგა ესწრებოდნენ.