თბილისისა და ბათუმის აეროპორტების ოპერატორმა კომპანია "ტავ ჰოლდინგმა" თურქეთში იზმირის აეროპორტის ადგილობრივი და საერთაშორისო ტერმინალების ოპერირების უფლების მოსაპოვებლად გამოცხადებულ ტენდერში 610 მლნ ევრო+დღგ-ის ღირებულების სატენდერო განაცხადით გაიმარჯვა.
პირობის მიხედვით, "ტავ ჰოლდინგს" მიენიჭა იზმირის აეროპორტის ოპერირების უფლება 2032 წლამდე. ამასთან "ტავ ჰოლდინგმა" აიღო ვალდებულება, განახორციელოს 250 მლნ ევროს ინვესტიცია აეროპორტში.
"ტავ ჰოლდინგმა" ყველაზე მაღალი 610 მილიონი ევროს ღირებულების სატენდერო განაცხადით გაიმარჯვა სახელმწიფო აეროპორტების ადმინისტრაციის მიერ გამოცხადებულ ტენდერში, რომლის შედეგადაც მას მიენიჭა იზმირის ადნან მედერესის აეროპორტის საერთაშორისო ტერმინალის, CIP-ის, ადგილობრივი ტერმინალის და სხვა დამხმარე საშუალებების ოპერირების უფლება. ტავ აეროპორტებმა ტენდერის 11-ივე ეტაპზე წარადგინა სატენდერო წინადადება და აჯობა ყველა სხვა ტენდერში მონაწილე კომპანიას, მათ შორის IC İçtaş-Fraport-ს და Limak-GMR Group-ს. იგი აღმოჩნდა საუკეთესო და ყველაზე მაღალი ღირებულების სატენდერო წინადადების ავტორი.
"ძალიან ბედნიერები ვართ, რომ გავიმარჯვეთ იზმირის ადნან მენდერესის აეროპორტის ოპერირებაზე გამოცხადებულ ტენდერში, რომელიც, ჩემი აზრით, უაღრესად მნიშვნელოვანი ინფრასტრუქტურული პროექტია. ახალი ტერმინალის შენობა, რომელიც უნდა აშენდეს და ადგილობრივი და საერთაშორისო ტერმინალების გაზრდილი გამტარუნარიანობა კიდევ უფრო მეტად შეუწყობს ხელს რეგიონის შემდგომ წინსვლას", - განაცხადა "ტავ ჰოლდინგის" გენერალურმა დირექტორმა სანი შენერმა.
სახელმწიფო აეროპორტების ადმინისტრაციის მონაცემების მიხედვით, 2011 წლის პირველი ათი თვის განმავლობაში იზმირის ადნან მენდერესის აეროპორტი მოემსახურა 7,332, 000 მგზავრს, ეს მონაცემები 15%-ით აჭარბებს 2010 წლის მაჩვენებლებს იმავე პერიოდისთვის.
ტავ ჰოლდინგი მსოფლიოს ერთ-ერთი წამყვანი ოპერატორია აეროპორტების ოპერირებაში და თბილისისა და ბათუმის საერთაშორისო აეროპორტების ოპერატორი კომპანიაა. ტავ ჰოლდინგი ასევე ოპერირებას უწევს სტამბულის, ანკარის, იზმირის, ალანიის საერთაშორისო აეროპორტებს თურქეთში, მაკედონიაში არსებულ 2 აეროპორტს და აეროპორტებს ტუნისში. 2012 წლიდან ჰოლდინგი დაიწყებს საუდის არაბეთის მედინას აეროპორტის ოპერირებასაც. ტავ აეროპორტები უზრუნველყოფენ აეროპორტების სხვა სფეროების ოპერირებასაც. ამას გარდა, უზრუნველყოფს უბაჟო ვაჭრობის, კვების ობიექტებისა და კომერციული სფეროს ოპერირებას რიგის აეროპორტში, ლატვიაში. 2010 წ. ტავ ჰოლდინგი მოემსახურა 420,000 რეისს და დაახლოებით 48 მილიონ მგზავრს.