"ქრისტიან-დემოკრატებმა" სადაზღვევო კომპანიების წარმომადგენლებთან პენსიონერების, 5 წლამდე ასაკის ბავშვებისა და შეზღუდული შესაძლებლობების მქონე პირთა, ჯანმრთელობის დაზღვევის საკითხების მოწესრიგების შესახებ ისაუბრეს.
მოძრაობის ლიდერების შეფასებით, მომავალი წლიდან დაზღვევის სფეროში ძალიან მნიშვნელოვანი ცვლილება განხორციელდება, თუმცა, აუცილებელია გათვალისწინებული იყოს ყველა ის საფრთხე და რისკფაქტორი, რაც შეიძლება თან ახლდეს ამ პროექტის განხორციელებას.
"აღნიშნული ცვლილებების განხორციელება წლების განმავლობაში "ქრისტიან-დემოკრატების" მოთხოვნა იყო და ჩვენ მივესალმებით ამ ინიციატივას, მაგრამ ჩვენთვის ასევე მნიშვნელოვანია, რომ დაზღვევის პოლისი არ იყოს ფარატინა ქაღალდი და ამ ადამიანებმა მიიღონ ზუსტად ის, რაც წერია დაზღვევის პოლისებში და რაშიც მთავრობამ სახელმწიფო ბიუჯეტიდან თანხა უნდა გადაიხადოს", - მაგდა ანიკაშვილმა.
"ქრისტიან-დემოკრატებმა" სადაზღვევო კომპანიების წარმომადგენლებისგან მოისმინეს მათი პოზიცია ცვლილებებთან და შესაძლო სირთულეებთან დაკავშირებით.
