18-19 ნოემბერს ბათუმში საქართველო-სომხეთის ეკონომიკური სამთავრობო კომისიის სხდომა გაიმართება, სადაც მხარეები მთელ რიგ ეკონომიკურ საკითხებს შეაჯერებენ.
საქართველოს ეკონომიკისა და მდგრადი განვითარების მინისტრი ვერა ქობალია სამუშაო ვიზიტით იმყოფებოდა სომხეთის რესპუბლიკაში. ვიზიტის ფარგლებში მან შეხვედრები გამართა სომხეთის სამთავრობო და ბიზნეს-სექტორის წარმომადგენლებთან.
სომხეთის პრემიერ-მინისტრ ტიგრან სარგსიანთან შეხვედრისას, საუბარი წარიმართა ორი ქვეყნის სავაჭრო-ეკონომიკურ ურთიერთობებზე. სომხეთი საქართველოს ერთ-ერთი უმთავრესი სავაჭრო პარტნიორია. ამ ქვეყანაში საქართველოს დადებითი სავაჭრო სალდო აქვს - უფრო მეტი პროდუქცია შეგვაქვს, ვიდრე იმპორტს გახორციელებთ და ეს ტენდენცია ყოველწლიურად იზრდება. გასულ წელს ექსპორტის მატებამ სომხეთში 80 პროცენტი შეადგინა. ამ პოზიტიურ მაჩვენებელებს მნიშვნელოვნად ჩამორჩება საქართველოში განხორციელებული ინვესტიციების მოცულობა სომხეთიდან - 2003-2011 წლებში მხოლოდ 2.4 მლნ. დოლარი.
ასევე გამართა შეხვედრა კოლეგებთან ეკონომიკისა და ტრანსპორტისა და კომუნიკაციის სამინისტროებში. განხილული იყო ის საკითხები, რომლებსაც ორი ქვეყნის ოფიციალური პირები განიხილავენ 18-19 ნოემბერს ბათუმში საქართველო-სომხეთის ეკონომიკური სამთავრობო კომისიის სხდომაზე.
სომხეთის მთავრობის წარმომადგენლებთან შეხვედრებზე ყურადღება გამახვილდა ერთობლივი ქართულ-სომხური ბიზნესების შექმნა-განვითარებაზე, რომლებიც არა მხოლოდ შეუწყობენ ხელს ორი ქვეყნის სავაჭრო-ეკონომიკური ურთიერთობების გაღრმაევბას, არამედ მოიზიდავენ ინვესტიციებს და შექმნიან ახალ სამუშაო ადგილებს. ერთ-ერთ ასეთ მიმართულებად ვერა ქობალიამ ტურიზმი დაასახელა.
ვიზიტის დასასრულს, საქართველოს ეკონომიკისა და მდგრადი განვითარების მინისტრი ქობალია მოხსენებით წარდგა საქართველო-სომხეთის ბიზნესფორუმზე. ამ წარმომადგენლობით საქმიან შეხვედრას ორი ქვეყნის ყველა მსხვილი კომპანიის წარმომადგენელი დაესწრო.