"ეკონომისტის" მიერ ორგანიზებულ კონფერენციაზე სიტყვით გამოვლისას გილაურმა ვრცლად ისაუბრა საქართველოს მიღწევებზე, გატარებულ რეფორმებზე და იქ დამსწრე საზოგადოებას, ინვესტორებსა და პოტენციურ ტურისტებს მოუწოდა, რომ სწორედ ახლა არის დრო, საქართველოში ჩამოვიდნენ, როგორც ტურისტები, ან სულაც, როგორც ინვესტორები.

როგორც გილაურმა განაცხადა, 2012 წელი იქნება მძიმე არა მხოლოდ საქართველოსთვის, არამედ ყველა ქვეყნისთვის, თუმცა "ახლა არის დრო, რომ საქართველოში ჩამოხვიდეთ როგორც ტურისტები, ან სულაც როგორც ინვესტორები".

როგორც გილაურმა განაცხადა, საქართველოს ეკონომიკა 2008 წლის ეკონომიკური კრიზისის და ომის შემდომ იზრდება. პრემიერ-მინისტრის განმარტებით, წელს მშპ-ის ზრდა იქნება 6,4-6,7 პროცენტის ფარლებში. ხოლო 2012 წლისთვის დაგეგმილია, რომ ზრდა 5,5 პროცენტის ფარგლებში იყოს.

პრემიერ-მინისტრმა სიტყვით გამოსვლის შემდეგ უპასუხა როგორც "ეკონომისტის" ჟურნალისტების, ისე კონფერენციაში მონაწილე სხვადასხვა ბიზნესმენის შეკითხვებსაც. როგორც გილაურმა განაცხადა, საქართველოს დონორთა კონფერენციაზე გამოყოფილი 5,5 მილიარდი დოლარიდან მხოლოდ ნახევარი აქვს ათვისებული. ამ დროისთვის ათვისებულია 2,3 მილიარდი დოლარი. ხოლო დანარჩენი არის დაკონტრაქტებული და ქვეყანა მას უახლოესი 2-3 წლის განმავლობაში საჭიროების შემთხვევაში გამოიყენებს.

პრემიერ-მინისტრმა ხაზი გაუსვა იმასაც, რომ საქართველოს ეკონომიკა რეგიონში ყევლაზე კარგად განვითარებადი ეკონომიკაა. საქართველოში სხვადასხვა პროექტის დაფინანსებით მრავალი საერთაშორისო ორგანიზაციაა დაინტერესებული. მისი თქმით, კვირა არ გადის ისე, რომ მან არ მიიღოს ამა თუ იმ საერთაშორისო ორგანიზაციიდან სხვადასხვა პროექტის დაფინანსების შესახებ მზადყოფნა.

შეგახსენებთ, რომ მსოფლიო გამოცემა "ეკონომისტის" კონფერენცია საქართველოში თავად გამოცემის სურვილით და ორგანიზებით ჩატარდა. კონფერენზიაში ბიზნესმენებთან და ეკონომისტის ჟურნალისტებთან ერთად მონაწილეობა მთავრობის ეკონომიკურმა გუნდმაც მიიღო, რომლებმაც კონფერენციაზე დამსწრეთა ყველა შეკითხვას უპასუხეს.