ფინანსთა სამინისტროს აკადემიის, შვეიცარიის განვითარებისა და თანამშრომლობის სააგენტოსა და ჟენევის სამაგისტრო ინსტიტუტის ორგანიზებით, საერთაშორისო ფინანსების თემაზე ერთობლივი ტრენინგი გაიხსნა. ტრენინგი გახსნეს საქართველოს ფინანსთა მინისტრმა დიმიტრი გვინდაძემ და შვეიცარიის განვითარებისა და თანამშრომლობის სააგენტოს SDC-ის რეგიონულმა დირექტორმა რუდოლფ შოხმა.
ეს არის ჟენევის სამაგისტრო ინსტიტუტის პირველი ამგვარი სასწავლო კურსი საქართველოში და მისი სამიზნე კატეგორიაა - ეკონომიკურ, ფისკალურ და ფულად-საკრედიტო პოლიტიკის ფორმირებასა და განხორციელებაში ჩართული საქართველოს სხვადასხვა სათანადო უწყების მოხელეები. სასწავლო კურსი მიზნად ისახავს პროფესიული გამოცდილების შემდგომ გაღრმავებას და აზრთა ურთიერთგაზიარებას ისეთ საკითხებზე, როგორიცაა: მსოფლიოში ბოლო დროს განვითარებული ფინანსური კრიზისი, ფისკალური და მონეტარული პოლიტიკა, საბანკო სექტორი და ფინანსური სტაბილურობა. ტრეინინგს ჟენევის სამაგისტრო ინსტიტუტიდან მოწვეული ფინანსური პოლიტიკისა და მაკროეკონომიკის ექსპერტები ატარებენ.
"ეს პირველი სასწავლო კურსია, რომელიც საკმაოდ ძლიერი სასწავლო დაწესებულების - შვეიცარიის სამაგისტრო ინსტიტუტის ორგანიზებით ტარდება ფინანსთა სამინისტროს აკადემიის ბაზაზე. კურსი დასაწყისია იმ თანამშრომლობისა, რომელიც ფინანსთა სამინისტროს ექნება აღნიშნულ ინსტიტუტთან. ფინანსთა სამინისტროს აკადემია განაგრძობს კონტაქტების დამყარებას სხვადასხვა საერთაშორისო ორგანიზაციასთან, მათ შორის, საერთაშორისო სავალუტო ფონდთან და 2012 წელს საქართველოში პირველად ჩატარდება საერთაშორისო სასწავლო კურსი ფინანსური პროგრამირების და პოლიტიკის კუთხით", - განაცხადა ფინანსთა მინისტრმა დიმიტრი გვინდაძემ.
მისი თქმით, ფინანსთა სამინისტროს აკადემიას აქვს ყველა პირობა იმისთვის, რომ ჩამოყალიბდეს გადამზადების სრულყოფილ ცენტრად არა მხოლოდ ფინანსთა სამინისტროსთვის, არამედ ყველა იმ უწყებისთვის, რომელიც ჩართულია ფულად-საკრედიტო, ფისკალური და ზოგადად, ქვეყნის ეკონომიკური პოლიტიკის წარმართვაში.
სასწავლო კურსში საქართველოს ფინანსთა სამინისტროს თანამშრომლებთან ერთად საქართველოს ეროვნული ბანკისა და კონტროლის პალატის წარმომადგენლებიც მონაწილეობენ. პროფესიულ მომზადებას 25 მონაწილე გადის. ტრენინგი 18 ნოემბერს დასრულდება.
ტრეინინგი თემაზე - "საერთაშორისო ფინანსები და მასთან დაკავშირებული საკითხები" საერთაშორისო ურთიერთობების გაძლიერების პროექტის CABIR-ის ფარგლებში ხორციელდება. პროექტი შვეიცარიის განვითარებისა და თანამშრომლობის სააგენტოს დაფინანსებით მოქმედებს და მიზნად ისახავს სახელმწიფო მოხელეების პროფესიული განვითარების ხელშეწყობას.
ფინანსთა სამინისტროს აკადემია სახელმწიფო-საგანმანათლებლო დაწესებულებაა, რომელიც მიზნად ისახავს ფინანსთა სამინისტროს სისტემის თანამშრომელთა პროფესიულ მომზადება/გადამზადებას, ახალი და კვალიფიციური კადრებით სისტემის დაკომპლექტების ხელშეწყობას. აკადემია მჭიდროდ თანამშრომლობს როგორც სხვა სახელმწიფო დაწესებულებებთან, ასევე კერძო სექტორთან, საერთაშორისო ორგანიზაციებთან და უმაღლეს სასწავლებლებთან. აკადემიისა და საერთაშორისო ორგანიზაციების თანამშრომლობით უკვე არაერთი ტრეინინგი განხორციელდა და ეს პროცესი მომავალშიც გაგრძელდება.
