ომის ვეტერანებისთვის დახმარების გაზრდის საკითხის წამოჭრისას პარლამენტში მხოლოდ ომების თარიღების გახსენებით შემოიფარგლნენ.
პარლამენტის დღევანდელ სხდომაზე, ბიუჯეტის პროექტის განხილვისას ვეტერანების დახმარების საკითხი ფრაქცია "ქრისტიან-დემოკრატების" თავმჯდომარე გიორგი ახვლედიანმა წამოჭრა. მან აღნიშნა, რომ ისინი ხელისუფლებას მხოლოდ 8-9 მაისს ახსენდება.
საპარლამენტო უმრავლესობის წევრმა აკაკი მინაშვილმა ახვლედიანს მოუწოდა, გაიხსენოს, როდის იყო ომი და შეახსენა, რომ პენსიების მატება 67 წლის ასაკიდან უკვე გათვალისწინებულია. "ქრისტიან-დემოკრატებმა" მინაშვილს შეახსენეს, რომ საქართველოს ჰყავს აფხაზეთის ომისა და 2008 წლის აგვისტოს ომის ვეტერანებიც.
ამის შემდეგ, საპარლამენტო უმრავლესობის წევრმა ვახტანგ ბალავაძემ საპარლამენტო ოპოზიციას შეახსენა, რომ სწორედ მათ რიგებში არიან ის ადამიანები, რომლებიც ამ ომებში საქართველოს ადანაშაულებენ და ამით შეურაცხყოფას აყენებენ ომის ვეტერანებს.
