აკადემია ერთი წლის წინ სრულიად საქართველოს კათოლიკოს-პატრიარქის ილია მეორის , თბილისის მერიის მხარდაჭერით და ცნობილი პიანისტის ვალერიან შიუკაშვილის თაოსნობით დაარსდა. მისი მიზანია გამოავლინოს ახალგაზრდა თაობის ნიჭიერი წარმომადგენლები და ხელი შეუწყოს მათ შემდგომ ზრდასა და განვითარებაში.
„ხელოვნების აკადემიის" ლიტერატურულ, კლასიკური მუსიკის, ფერწერის, ქართული სიმღერის კონკურსების შედეგად გამოვლენილი ნიჭიერი ახალგაზრდები სტიპენდიებს „თელასის" დაფინანსებით მიიღებენ, დაესწრებიან მასტერკლასებს, მონაწილეობას მიიღებენ კონცერტებში, გამოფენებში, ლიტერატურულ საღამოებში და კონკურსებში როგორც საქართველოში, ასევე უცხოეთში. 2012 წლის მანძილზე „ხელოვნების აკადემიის" კონკურსის ოცი ლაურიატი „თელასის" სტიპენდიას მიიღებს.

„მოხარული ვარ, რომ ჩვენს კომპანიას კიდევ ერთი შესაძლებლობა გაუჩნდა ხელი შეუწყოს ნიჭიერ ახალგაზრდებს ხელოვნების სხვადასხვა სფეროში შესაძლებლობების რეალიზებაში. ახალგაზრდობის სულიერი და კულტურული დონის ამაღლება ერთერთი ყველაზე მნიშვნელოვანი მიმართულებაა „თელასის" სასპონსორო და საქველმოქმედო საქმიანობაში. ჩვენ ყოველთვის მზად ვართ დავეხმაროთ ახალგაზრდებს შემოქმედებითი შესაძლებლობების განხორციელებაში. მინდა ნიჭიერ ახალგაზრდებს უდიდესი წარმატებები და შემოქმედებითი მიღწევები ვუსურვო"- განაცხადა „თელასის" საზოგადოებასთან ურთიერთობის დეპარტამენტის ხელმძღვანელმა ვალერი ფანცულაიამ.

"თელასი" საქართველოს კულტურის და ხელოვნების განვითარების ხელშემწყობ რამოდენიმე პროექტს აფინანსებს, მათ შორის ერთერთი მნიშვნელოვანია სრულიად საქართველოს კათოლიკოს პატრიარქის საერთაშორისო ფონდის მიერ ორგანიზებული საერთაშორისო მუსიკალური ფესტივალი „აღდგიმიდან ამაღლებამდე" რომლის მიზანსაც ახალგაზრდა ქართველ შემსრულებელთა შემოქმედების პოპულარიზაცია წარმოადგენს.