ლევილი 11-13 ნოემბერს ქართულ-ფრანგული კულტურის დღეებს მასპინძლობს. სოფლის მეურნეობის სამინისტროს ინფორმაციით, მინისტრის მოადგილე კონსტანტინე კობახიძე, საფრანგეთში, ლევილში გაემგზავრა, სადაც 11-13 ნოემბერს ქართულ-ფრანგული კულტურის დღეები გაიმართება. ღონისძიება დიასპორის საკითხებში სახელმწიფო მინისტრის აპარატის და სოფლის მეურნეობის სამინისტროს ინიციატივით ჩატარდება. ქართული დელეგაცია, სახელმწიფო მინისტრის პაპუნა დავითაიას ხელმძღვანელობით, შეხვედრებს როგორც ადგილობრივი თვითმმართველობის, ასევე ქართული დიასპორის წარმომადგენლებთან გამართავს.
ვიზიტის ფარგლებში დაგეგმილ სხვადასხვა ღონისძიებებთან ერთად, ლევილის ისტორიულ, ქართულ მამულში, შატოში და ქალაქის მერიის მიმდებარე ტერიტორიაზე ქართული ვაზი დაირგვება. ლევილში ჩასულ სტუმრებს საშუალება ექნებათ პარიზში არსებული ქართული კულტურის კერასთან ,,ლაზი" არსებული ანსამბლის შემოქმედებას გაეცნონ და ნოე ჟორდანიას სახელობის ინსტიტუტის მიერ მომზადებული ქართული კერძები დააგემოვნონ.
