დღეს, 14:00 საათზე, ათონის მთაზე საეკლესიო მსახურება ქართული საგალობლების თანხლებით, ქართულ ენაზე აღევლინება. ქართველი სასულიერო პირები ყოვლადწმიდა ღვთისმშობლის პარაკლისთან დაკავშირებულ საეკლესიო მსახურებას ერთდროულად სამ ქვეყანაში: საქართველოში, ისრაელსა და საბერძნეთში აღავლენენ.
თბილისში, მახათას მთაზე ათონის მთის ქართული მონასტრის ქტიტორების ექვთიმე, გიორგი და იოანე მთაწმინდელების სახელზე აგებულ ტაძარში პარაკლისს მეუფე იაკობი გადაიხდის.
ისრაელში ღვთისმშობლის საფლავზე საეკლესიო მსახურებას მამა ილია ნასიძე წარუძღვება.
ათონის მთაზე კი ქართველთა მონასტერ ივერონში საქართველოს კათოლიკოს-პატრიარქის ლოცვა-კურთხევით პაატა ბურჭულაძესთან ერთად მახათას მთაზე მშენებარე სამონასტრო კომპლექსის საორგანიზაციო ჯგუფი იმყოფება. პარაკლისი ღვთისმშობლის წყაროსთან ქართული საგალობლების თანხლებით, ქართულ ენაზე გადაიხდება.
