ირაკლი ალასანია ბათუმში "ჭაობის დასახლების" მცხოვრებლებს შეხვდა და იქ არსებულ პრობლემებს გაეცნო. ალასანიას განცხადებით, ხელისუფლების დაპირებების მიუხედავად, უკვე რამდენიმე წელია ამ ადამიანებს არ უგვარდებათ სასმელი წყლის მიწოდების და გაზიფიკაციის პრობლემა.
მისსივე თქმით, ეს ხალხი მიტოვებული ჰყავს როგორც ადგილობრივ, ასევე ცენტრალურ ხელისუფლებას.
"დღეს მე აქ არც ერთი დასაქმებული არ შემხვედრია, არადა თითქოს რეკლამებსაც ვხედავთ, რომ დასაქმების პროგრამები ხორციელდება. ამ რაიონებში განსაკუთრებით გაიზარდა დაავადებულთა რიცხვი, იმის გამო რომ არ არსებობს პრევენციული მედიცინა", - განაცხადა ირაკლი ალასანიამ.
"თავისუფალი დემოკრატების" ლიდერმა ადგილობრივ და ცენტარალურ ხელისუფლებას მოუწოდა, ნუ დაყოფენ ადამიანებს პოლიტიკური შეხედულებების მიხედვით. მისი თქმით, ყველას უნდა მიეცეს შესაძლებლობა საკუთარი შრომით ირჩინონ თავი. ირაკლი ალასნიამ ბათუმელებს ასევე ესაუბრა „თავისუფალი დემოკრატებისა" და ბიძინა ივანიშვილის პარტნიორობაზე და იმ ცვლილებებზე, რომელიც ალსანიას მტკიცებით, მომავალ საპარლამენტო არჩევნებზე აუცილებლად განხორციელდება.
ირაკლი ალასანიამ ადგილობრივებს "თავისუფალი დემოკრატების" მიერ შემუშავებული პროგრამები გააცნო, რომელიც ჯანდაცვის, დასაქმებისა და სოფლის მეურნეობის სფეროების განვითარებას ეხება.
