კომპანია „კარტლისი" ამერიკული კომპანია „პიონერის" სათესლე ხორბლის ორი ახალი ჯიშის საცდელ თესვას იწყებს. ხორბალი საქართველოს სხვადასხვა რეგიონში ასორმოცდაათ ჰექტარ ტერიტორიაზე დაითესება.
კომპანია „კარტლისის" მენეჯმენტის ცნობით, თესვები საქართველოს ტრადიციული მეხორბლეობის ზონებში: შირაქში, ალაზნის ველზე, ყვარელში, საგარეჯოში, გორში, დმანისსა და სართიჭალაში განხორციელდება.
„ეს არის საცდელი თესვა, თუმცა ფართობი, რომელზეც ხორბალი დაითესება საკმაოდ დიდია. ჩვენ გვსურს დავადგინოთ, თუ რამდენად მოსავლიანი იქნება აღნიშნული ჯიშები საქართველოს პირობებში და როგორ მიესადაგებიან ისინი ჩვენს კლიმატურ პირობებს. ამჯერად გამოცდაშია ორი ჯიში. მსოფლიო პრაქტიკის თანახმად, აღნიშნული ჯიშები ერთ ჰექტარზე 6-8 ტონა მოსავალს იძლევა. წარმატებული მოსავლის შემთხვევაში ნათესების ფართობს გავზრდით და აღნიშნული სათესლე ხორბალი ფართო გაყიდვაში გავა,"- აცხადებს კომპანია "კარტლისი"-ს დირექტორი რობერტ რევია.
კომპანიის მენეჯმენტი ვარაუდობს, რომ ექსპერიმენტი გაამართლებს და ისეთივე წარმატებული იქნება, როგორც ამერიკის შეერთებულ შტატებში და ევროპის ქვეყნებში.
„სხვა კულტურებში მიღწეული წარმატებების გამო კომპანია „პიონერმა" გადაწყვიტა წლევანდელი წლიდან უკვე ხორბლის საცდელი თესვებიც წამოეწყო საქართველოში. სამწუხაროდ, დღემდე ჩვენს ქვეყანაში საკმაოდ მოძველებულ, უხარისხო და დაბალმოსავლიან ჯიშებს თესავენ, ვინაიდან ქვეყანაში მაღალმოსავლიანი სათესლე მასალის პრობლემაა. აღნიშნულ საცდელ ნაკვეთებში, გამოყენებული იქნება ხორბლის მოყვანის მოწინავე თანამედროვე ტექნოლოგიები.
კომპანიის მენეჯმენტის ინფორმაციით, საცდელი თესვები ზონების მიხედვით ხვალიდან დაიწყება და მომდევნო ორ კვირას გასტანს.
კომპანია „კარტლის"-ი (ყოფილი „გარემო და ანალიტიკა") 1997 წელს დაარსდა და მუშაობს სოფლის მეურნეობაში არსებული ყველა მიმართულებით: სათესლე მასალა, სასუქები, მცენარეთა დაცვის საშუალებები, საირიგაციო სისტემები, სასოფლო-სამეურნეო კულტურების წარმოება. ამ დროისთვის იგი თანამშრომლობს სოფლის მეურნეობის მიმართულების ისეთ მსოფლიო ბრენდებთან როგორებიცაა: DuPont, Pioneer, Bejo, TimacAgro და Stet Holland. კომპანიას გააჩნია ფერმერთა მომსახურების ცენტრები და სავაჭრო ობიექტები საქართველოს სხვადასხვა რეგიონში მათ შორის: ლაგოდეხში, ბოლნისში, წნორში, გორში, ზუგდიდში და სხვა რაიონულ ცენტრებში.
„კარტლის"-ი ამერიკული კომპანია „დიუპონის" ჯილდოს „ENVIRONMENTAL RESPECT AWARDS"-ის მფლობელია. კომპანიას ჯილდო პესტიციდების დისტრიბუციის საუკეთესო მენეჯმენტისთვის გადაეცა. დაჯილდოება აშშ-ს დედაქალაქ ვაშინგტონში კაპიტოლიუმის შენობაში ზაფხულში შედგა.
