პაკისტანის პროკურატურამ ქვეყნის ყოფილი პრემიერ-მინისტრის ბენაზირ ბხუტოს მკვლელობაში ეჭვმიტანილ შვიდ ადამიანს ბრალი წაუყენა. პროკურორის განცხადებით მათ რიცხვში ხუთი ბოევიკი და ორი პოლიციელია.
"ამ ადამიანებს ბრალად ედებათ შეთქმულების მომზადება და ასევე მკვლელობის ხელშეწყობა", _ განაცხადა მან. აღსანიშნავია, რომ უსაფრთხოების ზომებიდან გამომდინარე სასამართლოს სხდომა დახურულ რეჟიმში მიმდინარეობდა.
შეგახსენებთ, რომ ბენაზირ ბხუტო - პაკისტანის სახალხო პარტიის ლიდერი და ერთადერთი ქალი იყო, რომელსაც ქვეყნის მთავრობის თავმჯდომარის თანამდებობა ეკავა. იგი 2007 წლის 27 დეკემბერს თავის მომხრეებთან მიმდინარე მიტინგზე მოწყობილი ტერაქტის შედეგად დაიღუპა ცენტრალურ მოედანზე. მის გარდა, აფეთქების მსხვერპლი 16 ადამიანი გახდა.
