„ქრისტიან-დემოკრატები" რეგიონებში შეხვედრებს განაგრძობენ. გიორგი თარგამაძე და გიორგი ახვლედიანი დღეს სენაკის რაიონის სოფლებში მრავალსულიან ოჯახებს ესტუმრნენ და საჩუქრად პროდუქტები გადასცეს. დღესვე პარტიის ლიდერები სოფელ ხორში მოსახლეობას შეხვდნენ.
„აქაც იგივე სურათი დაგვხვდა, რასაც სხვა სოფლებში ვნახულობთ. მოსახლეობას უკიდურესად უჭირს, არ არის ამბულატორია, ავარიულ მდგომარეობაშია გზები და ამორტიზებულია ხიდი, სკოლების ოპტიმიზაციის გამო ბავშვებს 8 კილომეტრის გავლა უწევთ... სახელმწიფოს ვალია პრიორიტეტების სწორად განსაზღვრა და მოსახლეობისთვის ისეთი პირობების შექმნა, როცა ადამიანები საკუთარი შრომით შეძლებენ ღირსეული საარსებო პირობების შექმნას. ჩვენი ძალისხმევაც სწორედ თვითკმარი საზოგადოების ჩამოყალიბებისკენაა მიმართული" - განაცხადა გიორგი თარგამაძემ.
