ევროპის საბჭოს წევრი ქვეყნების მე-17 საერთაშორისო კონფერენციის ფარგლებში, კიევში უკრაინის რეგიონული განვითარების, მშენებლობისა და კომუნალური მომსახურების მინისტრმა ანატოლი ბლიზნიუკმა და საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა რეგიონული განვითარების სფეროში თანამშრომლობის შესახებ მემოურანდუმს მოაწერეს ხელი.
მემორანდუმის ძირითადი საკითხებია, რეგიონული განვითარების პროექტების შემუშავება და განხორციელება; ტრეინინგების, სემინარებისა და შეხვედრების ჩატარება ადგილობრივი თვითმმართველობებისა და რეგიონული ადმინისტრაციების წარმომადგენლებისათვის და გამოცდილების გაზიარება რეგიონთაშორისი და ტრანსასაზღვრო თანამშრომლობის საკითხებზე.
კიევში გამართულ ევროპის საბჭოს წევრი ქვეყნების მე-17 საერთაშორისო კონფერენციას საქართველოს სახელით მინისტერიალში რეგიონული განვითარებისა და ინფრასტრუქტურის მინისტრი რამაზ ნიკოლაიშვილი სტუმრობდა.
2 დღიანი მინისტერიალი უკრაინის პრემიერ მინისტრმა ნიკოლაი აზაროვმა გახსნა. მინისტერიალის ერთ-ერთი მთავარი თემა ევროსაბჭოს წევრი ქვეყნების მიერ ეკონომიკური კრიზისის დაძლევა გახლავთ. მინისტერიალის მიზანია, ევროსაბჭოს წევრმა ქვეყნებმა გააძლიერონ მუშაობა ადგილობრივ და რეგიონულურ დონეზე დემოკრატიის გასავითარებლად.
მინისტერიალზე ევროსაბჭოს წევრი ქვეყნების წარმომადგენლების მიერ გამართული დისკუსიის შემდეგ, მიიღეს დეკლარაცია, რომელიც მომავალი ორი წლის განმავლობაში ევროპის წინაშე არსებული გამოწვევების, მათ შორის ეკონომიკური კრიზისის დაძლევას, ადამიანის უფლებების დაცვას და ადგილობრივ თვითმმართველობებში დემოკრატიის განვითარებას ისახავს მიზნად. მინისტრებმა ასევე იმსჯელეს ტრანსსასაზღვრო ურთიერთობის ხელისშემშლელი ფაქტორების დაძლევის გზებზე, რათა თანამშრომლობა სოციალურ, ეკონომიკურ და კულტურულ სფეროებში უფრო ეფექტური გახდეს.
რამაზ ნიკოლაიშვილმა ევროპული და ადგილობრივი მედიისათვის ბრიფინგი გამართა. ჟურნალისტები განსაკუთრებით ქვეყანაში მიმდინარე რეფორმებითა და იმ სტატისტიკური მონაცემებით დაინტერესდნენ, რომელთა მიხედვითაც საქართველო, საერთაშორისო ორგანიზაციების მიერ ბოლო პერიოდში ჩატარებული მრავალი კვლევის შედეგად წამყვან პოზიციებს იკავებს. კითხვების დიდი ნაწილი, სწორედ, ამ საკითხებს და საქართველოს რეგიონებში ინფრასტრუქტურის განვითარების ტემპებს შეეხებოდა.
ქართულმა დელეგაციამ დიდი ბრიტანეთის, გერმანიის ფედერაციული რესპუბლიკის, ლიტვის, ლატვიის და ესტონეთის რეგიონული განვითარების მინისტრებთან სამუშაო შეხვედრები გამართა, რის შემდეგაც რამაზ ნიკოლაიშვილმა კოლეგა მინისტრებისაგნ თანამშრომლობის მიზნით, ოფიციალური მიწვევები მიიღო. მინისტერიალის დასასრულს ევროპის 47 ქვეყნის მინისტრმა სამახსოვრო ფოტო გადაიღო.