საქართველოს პრემიერ-მინისტრის ნიკოლოზ გილაურის განცხადებით, ქართულმა ღვინოებმა ჰონგ-კონგის ფესტივალზე მნიშვნელოვანი წარმატება მოიპოვეს, რაც ქართულ პროდუქციას გზას გაუხსნის ჩინეთისა და ჰონგ-კონგის ბაზრებზე შესასვლელად.
"იქ 8 ათასზე მეტი ღვინო იყო წარმოდგენილი, რომელთაგანაც 37 იყო ქართული. ქართულმა ღვინოებმა ამ ფესტივალში პირველად მიიღო მონაწილეობა და პირველი გამარჯვებებიც მოიპოვა. მთლიანობაში, ქართულმა ღვინოებმა 17 ბრინჯაოს, 1 ვერცხლისა და 1 ოქროს მედალი მიიღეს. სულ იყო 20 გრანპრი და აქედან ერთი გრანპრი მიიღო ქინძმარაულის მარნის ღვინო "საფერავმა". ეს არის რეალურად ჩინეთისა და აზიის ბაზარზე შესვლის პირველი ნაბიჯი, რადგან ეს ფესტივალი არის ყველაზე დიდი თავისი მასშტაბით რეგიონში", - განაცხადა პრემიერმა.
მისი თქმით, ჰონგ-კონგის ღვინის ბირჟა არის ყველაზე დიდი მექანიზმი ჩინეთში ღვინის შეტანისა.
"ყველაზე მეტი ღვინო ჩინეთში ჰონგ-კონგიდან შედის. შესაბამისად, ეს არის ათობით ათასი (თუ მილიონობით არა) მომხმარებელი. ეს არის მილიარდობით დოლარი საქართველოსთვის და ეს არის ძალიან ბევრი სამუშაო ადგილი. ჩინური კომპანიები ჩამოვლენ საქართველოში და ხელს მოაწერენ ბევრ ხელშეკრულებებს, რაც სამუშაო ადგილების შექმნას განაპირობებს", - განაცხადა გილაურმა.