სახალხო დამცველს ხელფასი გაეზრდება. სახალხო დამცველსა და საკონსტიტუციო სასამართლოს თავმჯდომარეს თანაბარი ოდენობის ხელფასი ექნებათ.
"სახალხო სამცველის შესახებ" კანონში ცვლილება შედის, რომლითაც სახალხო დამცველის ხელფასი კანონით იქნება დადგენილი.
დღემდე სახალხო დამცველს საკუთარი თანამდებობრივი სარგო თავად უნდა განესაზღვრა.
ახალი კანონპროექტით კი, სახალხო დამცველს თანამდებობრივი სარგო საკონსტიტუციო სასამართლოს თავმჯდომარის თანამდებობრივი სარგოს ოდენობით მიეცემა. საქართველოს საკონსტიტუციო სასამართლოს თავმჯდომარის თანამდებობრივი სარგო კი 5 650 ლარია.
დღეს იურიდიულ საკითხთა საპარლამენტო კომიტეტმა პირველი მოსმენით ეს კანონპროექტი განიხილა და მხარი დაუჭირა.
