სომხეთის დედაქალაქ ერევანში, ერევნის არქიტექტურის და მშენებლობის სახელმწიფო უნივერსიტეტის დაარსების 90 წლის საიუბილეო დღეების ფარგლებში, ჩატარდა უმაღლესი არქიტექტურული სკოლების 2011 წლის კურსდამთავრებულთა სადიპლომო ნამუშევრების XX საერთაშორისო დათვალიერება-კონკურსი არქიტექტურასა და დიზაინში.
პარალელურად მიმდინარეობდა სამეცნიერო კონფერენცია "ევროპულ არქიტექტურულ განათლებაში ინტეგრაცია რეგიონალური თავისებურებების გათვალისწინებით", რომელიც არქიტექტურული განათლების პრობლემებს მიეძღვნა.
კონკურსზე წარმოდგენილი იყო 78 არქიტექტურული სკოლის 565 ნამუშევარი, მათ შორის უკრაინიდან, ბელარუსიდან, რუსეთიდან, ყაზახეთიდან, ჩინეთიდან, იტალიდან და ესპანეთიდან.
საქართველოს ტექნიკური უნივერსიტეტის არქიტექტურის, ურბანისტიკის და დიზაინის ფაკულტეტმა კონკურსზე წარადგინა 6 სადიპლომო ნამუშევარი, რომელთაგან 3-3 სამაგისტრო და საბაკალავრო ნაშრომი იყო. ჩვენმა წარგზავნილებმა ამ დათვალიერება-კონკურსზე დიდ, აქამდე არნახულ წარმატებას მიაღწიეს. საერთაშორისო ჟიურის გადაწყვეტილებით I პრემია დაიმსახურეს მაგისტრანტებმა: ლევან მათიაშვილმა - თანამედროვე ხელოვნების მუზეუმის პროექტისთვის, გიორგი შაყულაშვილმა - სამთოსათხილამურო კომპლექსის პროექტისთვის ბაკურიანში (ხელმძღვანელი გია ნადირაძე); გიორგი მელაძემ - თანამედროვე გარემოში ახალი საცხოვრისის პროექტისთვის (ხელმძღვანელი მედეა მელქაძე); ბაკალავრებმა: ალექსანდრე ხასიამ - მრავალფუნქციური ბიზნეს-ცენტრის პროექტისთვის, ნანა ლეკვეიშვილმა - სასტუმრო კომპლექსის პროექტისთვის 100 ადგილზე (ხელმძღვანელი ზაზა სვანაძე).
ჟიურის გადაწყვეტილებით, მეორე პრემია მიენიჭა ბაკალავრ ვახტანგ ნემსაძეს - სასტუმრო კომპლექსის პროექტისთვის 300 ადგილზე (ხელმძღვანელი მედეა მელქაძე).
