საქართველოს სამეწარმეო ორგანიზაცია და „ქრისტიან-დემოკრატიული მოძრაობა" აცხადებენ ესეების კონკურსს „გზა კეთილდღეობისკენ". კონკურსანტთა ნამუშევრების გაგზავნა უკვე დაწყებულია სამოტივაციო, საგანმანათლებლო და ანალიტიკური ჟურნალის ინტერნეტ-მისამართზე 4motivi.com . ესეების მიღება 10 ნოემბრამდე გაგრძელდება. დაწესებულია 3 პრემია - პირველ ადგილზე 200 ლარი, მეორე ადგილზე - 150 ლარი და მესამე ადგილზე - 100 ლარი.
ესეების მომზადება შესაძლებელია სამ თემაზე - მეწარმის როლი ქვეყნის ეკონომიკურ განვითარებაში, მოტივაციის როლი ადამიანის ყოველდღიურ ცხოვრებაში და კიდევ ერთი თემაა - მე დავიბადე ლიდერად. ესეების გამოგზავნის ვადის დასრულებიდან 5 დღეში ჟიური გამოავლენს 15 ფინალისტ ავტორს, რომელთა თემებიც განთავსდება საიტზე, გამარჯვებულები კი ფეისბუკზე, ლაიქების რაოდენობის მიხედვით გამოვლინდებიან.
გიორგი თარგამაძის განცხადებით, „ქრისტიან-დემოკრატები" დაარსების დღიდან ზრუნავენ მცირე და საშუალო ბიზნესის ხელშეწყობაზე და საქართველოს სამეწარმეო ორგანიზაციასთან კონკრეტულ პროექტში თანამშრომლობაც ამ პოლიტიკის გაგრძელებაა.
„განსაკუთრებით მნიშვნელოვანია ამ მიმართულებით ახალგაზრდობის როლი და ამ პროექტშიც ძირითადად ახალგაზრდები არიან ჩართულნი. მცირე და საშუალო ბიზნესის ხელშეწყობის მიზნით ჩვენ სამთავრობო დონეზე არაერთი ინიციატივა დავაყენეთ. მიგვაჩნია, რომ პარალელურად არანაკლებ მნიშვნელოვანია იმ ჯგუფების დახმარება, რომლებიც დამოკიდებული არ არიან სახელმწიფოს დახმარებაზე და დამოუკიდებლად შეუძლიათ შედეგის მიღწევა. საბოლო ჯამში, ეს პროცესი ხელს უწყობს მომხმარებელი საზოგადოების მწარმოებელ საზოგადოებად ჩამოყალიბებას" - განაცხადა თარგამაძემ.
