დღეს, 2 ნოემბერს რუსთავის იუსტიციის სახლს სამხრეთ აფრიკელი ჟურნალისტები ეწვივნენ. ტელევიზიის, რადიოსა და პრესის წარმომადგენლები იუსტიციის სამინისტროს ახალი ბრენდით - იუსტიციის სახლით დაინტერესდნენ და სახელმწიფო მომსახურების სფეროში გატარებულ რეფორმებს გაეცვნენ. მედიის წარმომადგენლებს საშუალება მიეცათ, დაეთვალიერებინათ თვითმომსახურების, სწრაფი და ხანგრძლივი მომსახურების სივრცეები და სრული ინფორმაცია მიეღოთ იუსტიციის სახლების მუშაობის სპეციფიკის შესახებ.
საქართველოში სამხრეთ აფრიკელი ჟურნალისტების ვიზიტი ქვეყანაში მიმდინარე რეფორმების მიმართ პოტენციური ინვესტორების ინფორმირების მიზნით დაიგეგმა. ამ ქვეყნების ბიზნესწრეებმა, კერძოდ კი - სოფლის მეურნეობის სფეროში მოღვაწე კომპანიებმა საქართველოში ინვესტიციების განხორციელებისა და ბიზნესის კეთების სურვილი გამოთქვეს. იუსტიციის სახლში ვიზიტად მყოფი ჟურნალისტების განსაკუთრებული ინტერესიც სწორედ ბიზნესის რეგისტრაციის კუთხით გატარებულმა წარმატებულმა რეფორმებმა მიიპყრო.
