საქართველოს მთავრობა სსფ-სგან მორიგ ტრანშს ელოდება. როგორც დღეს საქართველოში სსფ-ს მუდმივმა წარმომადგენელმა ედუარდ გარდნერმა განაცხადა, პროგრამის ფარგლებში თანხა 2012-2013 წლებისთვის გამოიყოფა, თუმცა თანხის მოცულობა და გარკვეული დეტალების დაზუსტება უახლოეს პერიოდში მოხდება.
"მორიგ პროგრამაზე სსფ-თან მოლაპარაკებები ჯერ კიდევ მიმდინარეობს და პროცესი მომდევნო თვეშიც გაგრძელდება. პროგრამაში გათვალისწინებული იქნება 2012-2013 წლები და აქცენტი "სიფრთხილეზე" გაკეთდება, ანუ სსფ-გან გამოიყოფა საკრედიტო ხაზი, თუმცა თანხების ათვისება არ მოხდება, მანამ ვიდრე მთავრობას არ დაუდგება ისეთი გარემოება, რომელიც ამ საჭიროებას განაპირობებს. თანხების ათვისება მოხდება მხოლოდ იმ შემთხვევაში, თუ აღნიშნული რესუსი მთავრობას დასჭირდება. ამ ეტაპზე მთავრობასთან შეთანხმებულია თუ რა არის ზოგადად პროგრამის მიზანი, რაც იმაში მდგომარეობს, რომ ეკონომიკის განვითარება უნდა იყოს მდგრადი. ამისათვის კი აუცილებელია, ქვეყანაში შენარჩუნებული იყოს მაკროეკონომიკური, ფინანსური სტაბილურობა და აქცენტების გაკეთება ბიუჯეტის დეფიციტის შემცირებაზე იმისათვის, რომ საერთაშორისო ბაზრები ინარჩუნებდნენ ინტერესს საქართველოს ეკონომიკისადმი", - განაცხადა ედუარდ გარდნერმა.
გარდნერი განმარტავს, რომ თუ კი რომელიმე წყაროდან გაძნელდება თანხის მოძიება, მაშინ მთავრობას სსფ-ს რესუსრის ათვისების საშუალება მიეცემა.
საქართველოში სსფ-ს მუდმივი წარმომადგენელის ედუარდ გარდნერის განმარტებით, მთავრობასა და სსფ-ს შორის მოლაპარაკებები ინტენსიურად მიმდინარეობს და სსფ-ს ამ ეტაპზე რაიმე ხელსესახები მომენტი არ ვაქვს, რადგანაც ბიუჯეტის პროექტი ჯერ კიდევ განხილვის სტადიაშია და საბოლოო პარამეტრები არ არის გამოქვეყნებული.
"ჩვენ ველით, რომ რამდენიმე კვირის განმავლობაში მთავრობა პარლამენტში უკვე მეორე რედაქციით წარადგენს ბიუჯეტის პროექტს და სწორედ მაშინ შეიძლება პარამეტრების დაზუსტება", - აღნიშნა გარდნერმა.
შეგახსენებთ, რომ სსფ-ს მისია საქართველოში 2 კვირის განმავლობაში იმყოფებოდა და მტავრობასთან ქვეყნის ეკონომიკურ განვიტარებაზე და საქმომავლო გეგმებზე ინტენსიურად საუბრობდა.
