გერმანელმა მეცნიერებმა წარადგინეს ანგარიში, რომელის მიხედვითაც, რუსეთის მოსახლეობა იმაზე უფრო სწრაფად დაიწყებს შემცირებას, ვიდრე ეს ყველაზე პესიმისტური პროგნოზითაა გათვალისწინებული. ექსპერტები შემდგომი თანმდევი მოვლენებით შეშფოთებულები არიან, ვინაიდან ყოველივე შესაძლოა სახელმწიფოს დაშლამდე მივიდეს.
ბერლინის მოსახლეობისა და დემოგრაფიული განვითარების ინსტიტუტის მეცნიერებმა წარადგინეს ანგარიში, სახელწოდებით "მსოფლიო ზესახელმწიფო, რომელიც ქრება", ანგარიშის თანახმად, რუსეთის მოსახლეობა იმაზე უფრო სწრაფად შემცირდება, ვიდრე ეს ყველაზე პესიმისტური ოფიციალური პროგნოზითაა გათვალისწინებული.
მათი მონაცემებით, 2030 წლისათვის რუსეთის ფედერაციის მოსახლეობა 15 მილიონი ადამიანით შემცირდება, ხოლო 2050 წლისათვის კი - მიგრანტების შედინების მიუხედავად - რუსეთი მსოფლიოს მაცხოვრებელთა რაოდენობით მე-14 ადგილზე დაეშვება, მოსახლეობის კლება თითქმის 20 % იქნება და ქვეყანაში მხოლოდ დაახლოებით 116 მილიონი ადამიანი იცხოვრებს. ინფორმაციას ამის შესახებ "ნეზავისიმაია გაზეტა" ავრცელებს.
2030 წლისათვის ქვეყანაში ასევე მცირე იქნება ბავშვებისა და ჯანმრთელი მუშახელის რაოდენობა და იქნება ბევრი ხანდაზმული ადამიანი.
მოსახლეობის კლების მთავარი მიზეზი, უპირველეს ყოვლისა, მამაკაცების მაღალი სიკვდილიანობაა, რომელიც თავის მხრივ გულსისხლძარღვთა სისტემის დაავადებებთან, ზოგად დაავადებებთან, უბედურ შემთხვევებთან და ალკოჰოლის ჭარბ მოხმარებასთან იქნება დაკავშირებული. "წარმატებებს აღწევენ" ასევე ინფექციური დაავადებები, ისეთები როგორებიცაა - შიდსი და ტუბერკულოზი.
აღნიშნული ანგარიშის ავტორები ასევე დასძენენ, რომ შობადობის მკვეთრი ბუმი - ის რომც მოხდეს - ასევე რაღაც თვალსაზრისით საფრთხის შემცველია, ვინაიდან იგი სახელმწიფოს ხარჯების მომატებას გამოიწვევს სოციალურ სფეროში. და მხოლოდ ამის შემდეგ - შესაბამისი ჯანმრთელობისა და განათლების პირობებში - ეს პოტენციური მუშა-ხელი ქვეყნის გამდიდრებას შეუწობენ ხელს.