კერძო სექტორს დიდი პროექტების განხორციელებაში საპარტნიორო ფონდი დაეხმარება და ბიზნესრისკებსაც გაითვალისწინებს. ამის შესახებ საქართველოს პრემიერ-მინისტრმა ნიკოლოზ გილაურმა ვიდეოკონფერენციის დროს განაცხადა.
"საპარტნიორო ფონდი ჩამოვაყალიბეთ ერთადერთი მიზნით - შევამციროთ იმპორტი და გავზარდოთ ექსპორტი. ბალანსი სწორედ რომ ინვესტიციებით სწორდება. საპარტნიორო ფონდი მიიღებს ძალიან მსხვილ ინვესტიციას, ტევად მონაწილეობას და თანადაფინანსებას გაიზიარებს. მაგალითად, ნამახვანჰესისა და ნესკრაჰესის პროექტების განხორციელებას კერძო სექტორი ჯერ ვერ რისკავს. ინტერესი კი არის, მაგრამ ის, რომ 850 მლნ დოლარის ჩადოს ვინმემ პროექტში, ჯერ რთულია. მათ ამაში დაეხმარება საპარტნიორო ფონდი და მათთან ერთად გაიზიარებს რისკებს", - განაცხადა გილაურმა.
საქართველოს მთავრობამ შექმნა საპარტნიორო ფონდი. ფონდის აქტივები გამოყენებული იქნება მსხვილი საინვესტიციო პროექტების განსახორციელებლად, რომლებიც უპირატესად საქართველოს საექსპორტო პოტენციალს და დასაქმებას გაზრდიან ისეთი პროექტებით, რომელთაც კერძო სექტორი სახელმწიფოს თანამონაწილეობის გარეშე ვერ ძლევს სასტარტო გარემოებებიდან და რისკებიდან გამომდინარე. პროექტების განხორციელების მექანიზმი ითვალისწინებს ფონდის მხრიდან წილობრივ მონაწილეობას ან ინვესტორთან შესყიდვის ხელშეკრულების გაფორმებას ენერგეტიკის სფეროში წარმოებულ პროდუქციაზე. საკრედიტო რესურსი მოზიდული იქნება საერთაშორისო საფინანსო ინსტიტუტებიდან. ძირითადი პროექტები განხორციელდება ისეთ დასაქმებადტევად სფეროებში, როგორებიცაა ენერგეტიკის, სოფლის მეურნეობისა და ტურიზმის სფეროები. საპარტნიორო ფონდის დაფინანსების წყარო ასევე შეიძლება გახდეს სახელმწიფო საწარმოების აქციების საერთაშორისო ბირჟებზე განთავსების შედეგად მიღებული თანხები.
